18ê Teşrîna Peyêne de do ver bi Gemlîkî rayîrşîyayîş bêro kerdene

Hemserekê DTKyî Berdan Ozturkî dîyar kerd ke 18ê Teşrîna Peyêne de do ver bi Gemlîkî ‘Rayîrşîyayîşê Azadîye’ bêro kerdene.

Hemserekê DTKyî Berdan Ozturkî, Amed de konferansê DBPyî de qisey kerd. Berdanî dîyar kerd ke Lozanî ser ra se serrî vîyartê, Kurdî Lozanî ra dima çin hesibîyayê û vera pêro zulman Kurdan xo ver dayo.

‘Ma azadî wazenê’

Ozturkî va, “Înan waşt Kurdî bêstatu û bêîrade bimanê û hêrişî zî naye ser yenê kerdene. Ma cuyêka birûnete wazenê. Ma azadî wazenê. Ma tena seba xo ney seba pêro şaranê bindestan azadî wazenê. Ma ewro vînenê Filistîn de domanî û cinîyî senî yenê qetilkerdene. Zîhneyetê netewe dewletan ver nê qetlîamî benê. Bi qetlîaman meseleyî çareser nêbenê.”

Rayîrşîyayîşê Gemlîkî

Ozturkî behsê tecrîdî kerd û va, “Abdullah Ocalan her wext bi vengê haştîye û azadîye. 1993yî ra nat xeylê pêvînayîşî bîyê û netîceyê nê pêvînayîşan ameyê tecrubekerdiş. 5ê Nîsane 2021î ra nata Birêz Ocalanî ser de tecrîdêko giran yeno ramitene. No tecrîd, vera demokrasî, cuya azade û azadîye yeno ramitene. Ma do 18ê Teşrîna Peyêne de vera tecrîdî xeylê cayan ra ver bi Gemlîkî ‘Rayîrşîyayîşê Azadîye’ bidê dest pêkerdene. Kesê ke haştîye, azadîye û demokrasî wazenê ganî bibê beşdarê rayîrşîyayîşî. No tecrîd nîno qebulkerdene. Heta tecrîd bibo, ma do xoverdayîşê xo bidomnê. Seba azadîya Birêz Ocalanî do xoverdayîşê ma dewam bikero. Ma do bi rayîrşîyayîşî vengê xo birasnê pêro dinya.”

MA / AMED