Hêrişê Tirkîya xeylê bajaran de ameyê protestokerdene

Hêrişê Tirkîya yê ke Bakur û Rojhelatê Sûrîyeyî rê benê xeylê bajaran de bi eşkerayîyan ameyê protestokerdene.

Hêrişê Tirkîya yê ke 4ê Teşrîna Verêne ra nat Bakur û Rojhelatê Sûrîyeyî rê benê dewam kenê. Hêrişan de xeylê sivîlan cuya xo vîndî kerde û cayê sivîlî hedef gêrîyayê. Hêrişî bi eşkerayîyan xeylê bajaran de ameyê protestokerdene.

Qezaya Peyasî ya Amedî de, Parka Rojavayî de hêrişî ameyê protestokerdene. Xeylê temsîlkaranê partî û sazîyan bîyê beşdarê eşkerayîye. Girse hetê polîsan ra gêrîya binê ablûka û girse zî bi çalakîya roniştişî hêrişî protesto kerdê. Polîsan nêverda rojnamegerî dîmenan bigerê.

Dêrsim de zî polîsan Meydanê Seyîd Rizayî de hêrişê şarî kerd û Hemserekê HDPyî yê Dêrsimî Nazli Çelîk û Ferhat Yildiz û xeylê kesê bînî gêrîyayê binê çimî.

Parlamentera Partîya Çep a Keske ya Dêrsimî Ayten Kordu zî hetê polîsan ra gêrîyaye binê ablûka. Kordu va, “Heta meseleye Rojhelatê Mîyanênî çareser bibê, ma do vengê xo berz bikerê. Sivîlî yenê qetilkerdiş û no nîno qwbulkerdiş. Ganî ambargo bêro wedartene û qetlîamo ke Kurdan rê beno bêro vindertene.”

Riha, Wan, Mersîn, Mêrdîn, Edene, Êlih û Şirnex de zî hêrişê Tirkîya ameyê protestokerdene. Polîsan waşt protestoyan asteng bikerê û xeylê kesî gêrîyayê binê çimî.

MERKEZÊ XEBERAN