Hesen Koçer: Armancê hêrîşan çinkerdişê îdareyê xoserî yo
sêşem 22 teşrînê 2022 - 18:08
- Hetkarê Hemserekê Meclîsa Rayraberdişîya Îdareyê Xoserî Hesen Koçerî dîyar kerd ke, armancê hêrîşan çinkerdişê Îdareyê Xoserî yo.
Hêrîşê hewayî yê Tirkîya ke xeylê cayanê Bakur û Rojhelatê Sûrîyeyî rê benê vîzer şan ra nat bêmabên dewam kenê.
Hetkarê Hemserekê Meclîsa Rayrabirdişîya Îdareyê Xoserî derheqê hêrîşan de qisey kerd û va, “Ma hêverî keyeyanê şehîdan rê serweşîye wazenê. Armancê hêrîşanê pêyênan çinkerdişê ewleyîya mintiqa yo.”
Hêrîşa Îstanbûlî senaryo ya
Hesen Koçerî va, “Dewleta Tirke wazena bi nê hêrîşan şarî bitersna û Îdareyê Xoserî çin bikera. Hêrîşa Îstanbûlî seba ke mintiqa rê hêrîşê bibê bîye mehneyêk û sey tîyatroyî ya. Serekê MÎTî 2004î de vatibi ‘Eke seba şerê Sûrîyeyî mehneyêk lazim bo, ez çar merdiman şawena uca û bi destê înan roketan erzena’.”
Hukmatê Şamî, Amerîka û Rusya şerîkê hêrîşan ê
Dewamê qiseykerdişê xo de Koçerî va, “Hêrîşî newe nîyê. Hetê dewleta Tirke ra Efrîn, Cerablûs, Bab û cayê bînî ameyê îşxalkerdiş û nika zî wazena Îdareyê Xoserî çin bikera. Sehaya hewayî hetê Amerîka û Rusya ra ameya akerdene û têkilîyê Hukmatê Şamî û Tirkîya zî hêrîşan reyde têkildar ê. Hewaya hewayî anêbîyêne, dewleta Tirke nêşkayêne hêrîşe bikera. Rusya û dewletanê bînan seba menfeatê xo hêrîşan rê bîyê şerîk. Şarê Sûrîyeyî beno qurbanê hêzanê teberi û dewlwtanê cîranan. Bi nê hêrîşan do hucreyê DAÎŞî hîna aktîve bibê. Berpirsîyarê ney dewleta Tirke û Koalîsyono Mîyannetewî yê.”
Îdareyo Xoser do bêveng memano
Koçerî peynî de va, “Kombîyayîşê Soçî û Tehranî hêrîşan reyde têkildar ê. Kombîyayîşê Tehranî seba tasfîyeyê Îdareyê Xoserî virazîya. Dewleta Tirke bi SÎHAyan sivîlan û hêzanê eskerîyan hedef gêna. Senî ke QSDyî eşkera kerd, do cewabê nê nêrîşan bêro dayene.Ganî şarê mintiqa xo vera nê hêrîşan hedre bikero. Hedefê ma xoverdayîş û şerê şarî yo şorişger o. Şar ganî wayîrê Îdareyê Xoserî bivejîyo. Çunke nê hêrîşî do dewam bikerê.”