Hesen Koçer: Ma do şarê xo reyde xo ver bidê

• Hetkarê Hemserekê Meclîsa Îdareyê Xoserî yê Bakur û Rojhelatê Sûrîyeyî Hesen Koçerî va, “Ma nêşkenê paştîya xo bidê çewî, ma wazenê şorişî pîl bikerê.”

Hetkarê Hemserekê Meclîsa Îdareyê Xoserî yê Bakur û Rojhelatê Sûrîyeyî Hesen Koçerî derheqê gef û hêrîşanê Tirkîya de qisey kerd. Koçerî va, “Tirkîya seba e hêrîşa Bakur û Rojhelatê Sûrîyeyî bikera, kewta mîyanê têgêrayîşanê eskerî, sîyasî û dîplomatîkan. Qetlîamê Zaxoyî rîyê Tirkîya yo raştikên mojnayo ra. Tirkîya seba pêroyê dinya taluke ya.”

‘Tirkîya Daîşî temsîl kena’

Hesen Koçerî va, “Senî ke nika Iraqî de 66 nixtayê Tirkîya yê eskerî estê, wazena Sûrîyeyî de eynî çîyî bikera. Tirkîya paştî dana terorî. Sûrîyeyî kena têmîyan, Lîbyayî kena têmîyan, Iraqî kena temîyan. Kes ci rê veng nêkeno. Tirkîya Daîşî ra hîna talukeyin a. Daîş hinî tasfiye bi. Zîhnîyetê Daîşî hetê Tirkîya ra yeno temsîlkerdiş.”

‘Cinîyî hedef gêrîyayê’

Hesen Koçerî bêvengîya komela mîyanneteweyî rexne kerd û va, “Ma nê kerdenan qebul nêkenê. Ma do xo ver bidê. Wa kes mevajo xo mepawê. Ma mecbûrê ke xo bipawê. Bi şexsa Jiyan Tolhildane pêro cinîyî hedef gêrîyayê.”

‘Ma do şarê xo reyde xo ver bidê’

Koçerî va, “Ma nêşkenê paştîya xo bidê dewletêk. Ma şarê xo ra û hêza xo ra bawer ê. Ma nêşkenê paştîya xo bidê çewî. Ma tecrubeyanê xo ra zanê. Îdareyo Xoser rewşa awarte îlane kerde. Çimkî ma zanê ke verê ma de şerêko pîl esto. No do memano şeranê bînan. Do sey verî mebo. Wa Tirkîya mevaja do sey verî bo. Ganî komela ma tedbîranê pawitişî bigera.”

‘Ma do şorişî pîl bikerê’

Hesen Koçerî peynî de va, “Ma do cayanê îşxalkerdîyan azad bikerê. Ma timûtim va, nê cayî erdê Sûrîye yê. Coka ganî bêrê azadkerdiş. Ma şorişî bi hêsîranê dayîkan viraşt. Ma do şorişî aver de berê û pîl bikerê. Şorişê ma roje bi roje pîl beno û pê bawer ê ke do hîna pîlêr bo.”

ANF