Heyeto mîyannetewî keyeyanê Ocalan, Aktaş û Konarî reyde ame têhet

• Delegasyonê Mîyannetewî yê Vera Tecrîdî ra 12 endamî, Dîyarbekir de keyeyanê Serekê PKKyî Abdullah Ocalan, Veysî Aktaş û Omer Hayrî Konarî reyde ameyê têhet.

Delegasyonê Mîyannetewî yê Vera Tecrîdî ra 12 endamî ameyê Dîyarbekir. Mabênê 25-27ê Çeleyî de do hetê înan ra pêvînayîşî bêrê kerdene. Heyet verî cû birayê Abdullah Ocalanî Mehmet Ocalan, birarzayê ci û parlamentere HDPyî Omer Ocalan, maya Veysî Aktaşî Faîke Aktaşe û birayê Omer Hayrî Konarî Alî Konarî reyde ame têhet. Pêvînayîş otelêk de ame kerdene û hetê keyeyan ra rewşa tecrîdî ameye qiseykerdiş.

Îmrali de hiqûq nîno ramitene

Pêvînayîşî ra dima hetê keyeyan ra malûmatî ameyê dayene. Omer Ocalanî va, “Temsîlkar û aktîvîstê ke teber ra ameyê reyde ma ameyê têhet. Ma bêhiqûqîya Îmraliyî ser o qisey kerd. Îmrali de hiqûq nîno ramitene. Erjê merdimîye binpay bîyê. Ma do bi paştîdayîşan nê binpaykerdişan wedarê. Ma zanê ke Kurdistan û Tirkîya binê tecrîdî de yê. Ma raya pêroyî ya mîyannetewîye rê gazîye kenê, bêhiqûqîya ke cayêk de biba do bandorê xo cayanê bînan ser o zî bikera.

Paştîdayîşo enternasyonal muhîm o

Ma nê zîyaretî muhîm vînenê. Ma wazenê wa awiqatî cade şorê Îmrali û wa Birêz Ocalan û girewteyanê bînan reyde pêvînayîşan bikerê. No heqê ma yo qanûnî yo. Meseleya Kurdan, meseleyêka giran a. Her kes naye zano. Seba ke şarê ma asan bibo, ganî Birêz Ocalanî reyde pêvînayîşî bibê. Ma wazenê derheqê sihetê ci de malûmat bigerê. Paştîdayîşo enternasyonal seba şarê Kurdî zaf muhîm o. Xoverdayîşê ma do dormaleyê paradigmaya Birêz Ocalanî de bêro ramitene. Ganî cade tecrîd bêro weartiş.”

‘Wa berê Îmraliyî abibê’

Dima birayê Ocalanî Mehmet Ocalanî qisey kerd û va, “Çîyê ke Îmrali de qewimîyenê çîyê xirab ê û ganî kes înan qebul mekero. Eke hiqûq esto, ganî Îmrali de zî bêro ramitene. Na rewşe cayêkî dinya de çin a. Ma veng a herkesi danê, ganî cade çîyêk bêro kerdene. HDP ra teber, partîyanê bînan ra veng nêvejîyeno. Na şaşîyêka û nîna qebulkerdiş. Ganî cade berê Îmraliyî abibê.”

Maya Veysî Aktaşî Faîke Aktaşe zî va, “Ma bê haştîye çîyêk nêwazenê.”

Heyet do mîyanê roje de Dayîkanê Haştîye û MED-TUHAD-FEDî zîyaret bikero.

MA / DÎYARBEKIR