Hunermenda şorişgere: Hozan Mizgîn

• Hozan Mizgîn 30 serrî cuwaver perraye şîye.

Hozan Mizgîn 30 serrî cuwaver perraye şîye.

 Hozan Mizgîn 1962î de dewa Bileyder a Êlihî de maya x ora bîye. A darbeya 80î ra ver beşdara hereketê Kurdan bena. O wext mîyanê xebatanê sîyasîyan de Pkkyî şinasnena. Mazlûm Doxan ê wextan seba xebatanê sîyasîyan Êlih de bîyo. Hozan Mizgîn bi embazanê xo reyde kewena mîyanê refanê gerîlayan. A Êlihî de cinîya verên a ke beşdara Pkkyî bîya. 

Seba perwerdeyî şina Bekaa

Hozan Mizgîn seba perderdeyî şina kampa Bekaayî. Badê perwerdeyî ra seba xebatanê kultur û hunerî Hozan Sefkanî reyde şina Ewrûpa. Ê pîya Ewrûpa de bingeyê ‘Huner-Kom’ û ‘Koma Berxwedan’î erzenê. Xebatê înan aver şinê û Hozan Mizgîn zî dest bi berhemanê xo kena. Deyîranê weşan ê sey; ‘Çemê Hêzil’, ‘Lo Hevalo’ û ‘Gundîno Hawar’î vejena. Xebatê Hozan Mizgîn û embazanê aye benê destegîrê propagandayê şorişî.

Verê xo dana koyan

Badê xebatanê xo yê kultur û hunerî a verê xo dana koyanê Kurdistanî. Hozan Mizgîn verî sey Fermandara Eyaletî şina Mêrdîn. Dima şina mintiqaya Xerzanî. Mizgîn Xerzan de bena fermandara cinîya verêne. Seba ke xo birasna cinîyanê Xerzanî dilqê xo bedilnena û mîyanê şarî ra gêrena. 

Teslîmbîyayîşî qebûl nêkena

11ê Gulane 1992yî de a û embazê xo wazenê seba wezîfeyêk derbazê Tewwanî bê, keyeyêk de bi îstîxbaratê ajanan dormaleyê înan yeno girewtiş û şer qewimîyeno. Hozan Mizgîn seba ke teslîm nêba bi debançayê xo raywanîya xo ya fîzîkî qedînena.  Labelê vengê aye yo zîz û ruhê aye yo şorişger û hîsdar do timûtim zerrîyanê Kurdan de bicuwîyê.
ROJNEWS / SEMÎRA ŞAHABÎ – BOTAN GERMÎYANÎ