Kongreya MEBYA-DERî: Armancê ma yo tewr pîl azadîya Abdullah Ocalanî ya

Parlamenterê Partîya Çep a Keske Omer Ocalanî kongre de qisey kerd û va, “Armancê ma yo tewr pîl azadîya Abdullah Ocalanî ya.”

MEBYA-DERî kongreya xo ya 3yine Amed de viraşte. Sazîyan ra xeylê kesî bîyê beşdarê konnre. Kongre bi payravinderdişê hurmetî dest pêkerd.

‘Ma do wayîrê erjanê xo bivejîyê’

Hemsereka MEBYA-DERî Yuksel Elmase va, “Ma nêwazenê însanî bimirê. Keyeyan ser ra kayê gemarinî yenê kaykerdene û îşkenceyî yenê kerdene. Cenazeyê ma ameyê teşhîrkerdiş û bi kargo ameyê erşawitiş. Vera pêro tedayan ma do wayîrê erjanê bivejîyê. Abdullah Ocalanî reyde pêvînayîşî bibîyêne rewşe hende nêbîyêne xirabe.”

Azadîya Abdullah Ocalanî

Parlamenterê Partîya Çep a Keske yê Rihayî Omer Ocalanî kongre de qisey kerd û va, “Helbet ma wextanê xiraban ra vîyerenê la ewro şertî yê Zindanê Amedî ra xirabêr nîyê. Nê rojî rojê tarîxî yê. Eke ma bibê yew, ma do azadîye awan bikerê. Armancê ma yo tewr pîl azadîya Abdullah Ocalanî ya. Wazenê Kurdan bêstatu verdê. Koyanê Kurdistanî de vera domananê şarî çekê kîmyewîyî û qedexekerdeyî yenê gurînayene. Her roje suîqastî benê û domanê nê şarî yenê qetilkerdene.”

Hemserekê MEBYA-DERî Şeyhmûs Karadagî zî va, “Serran ra nat seba ke Kurdî asîmîle û çin bibê polîtîkayî yenê ramitene. Seba ke Kurdî çin bibê pêro rayîrî yenê ceribnayene. Vera nê polîtîkayan politikaya ma zî xoverdayîş o. Ma do çirey gamêk têpîya meerzê.”

Dayîkanê Haştîye ra Murvet Demîre zî dîyar kerd ke ganî her kes wayîrê MEBYA-DERî bivejîyo.

Qiseykerdişan ra dima weçînayîş virazîya û Mehmet Emîn Kiliç û Semra Akkoçe hemserekîya MEDYA-DERî rê ameyê weçînayene.

MA / AMED