‘Îddîaname çin o, dosya wesayîtêka marketî de yena çarnayene’

• Îddîanameyê 16 rognamegeranê Kurdan 60 rojî yo ke hedre nêbîya. Awiqat Resûl Temûrî va, “Dosya wesayîtêka marketî de yena çarnayene.”

8ê Hezîrane de Dîyarbekirî de 20ê înan rojnameger 22 kesî gêrîyayê binê çimî. Înan ra 6 kesî ameyê veradayîş û 16 kesî zî bi îddîayê ‘endamê rêxistinî’ ameyê girewtene. Dosyaya rojnamegeran de averşîyayîşêk çin o. Îtîrazê awiqatan red bîyê û 2 rey zî qerarê dewamê tepiştişî ame dayene.

Mabên ra 2 aşmî vîyertê la hema zî derheqê rojnamegeran de îddîaneme nêameyo hedrekerdiş. Awiqatanê rojnamegeran ra Resûl Temurî va, “60 rojî vîyertê la çi heyf ke dosyaya rojnamegeran de averşîyayîşêk nêbîyo. Ganî heta nika îddîaname biamêne hedrekerdiş la dosya 2 rey cigêrayîşê girewtişî ra vîyerte la îddîaname nêame hedrekerdiş.”

‘Dosya wesayîtêka marketî de ya’

Awiqat Resûl Temurî va, “Ma tim aqibetê dosya pers kerdêne la ma bawerîya xo pê arde ke, dosya wesayîtêka marketî mîyanî de mabênê hakîmtî û sawcîtîye de şîya û ameya. Wina aseno ke 60 rojî yo ke dosya qet wesayîkî ra nêameya ware.”

‘Ganî îddîaname biamêne hedrekerdiş’

Temurî va, “Ganî heya nika îddîaname biamêne hedrekerdiş. Goreyê qanûnî mudeyêk çin o la 60 rojî zî zêde yê. Çimkî rojnamegerî tena tedeyîya kare xo ser ra ameyê girewtene. Esasê xo de pêro delîlî zî ameyê arêdayîş. Ma zanê ke roporêk û cigêrayîşêk zî nînê kerdene. Na rewşe de, no ereyvistiş û hedrenêkerdişê îddîanemeyî rojnamegeran rê ceza ya.