Îstînaf zî dewaya eşkerakerdişê cayê mezela Şêx Seîdî red kerde

Îstînaf, qerarê mehkemeya herêmî tastîq kerd û dewa red kerde. Tornê Şêx Seîdî Kasim Firatî dîyar kerd ke ê do muracatê Mehkemeya Qanûnê Bingeyî bikerê.

Baroya Amedî, Komeleya Kultur û Perwerdeyî ya Şêx Seîdî û vasîyê Şêx Seîdî Kasim Firatî, bi waştişê eşkerakerdişê cayê mezela Şêx Seîdî vera Wezaretîya Karanê Zereyî dewa akerdibî û na dewa hetê mehkemeya herêmî ra amebî redkerdene. Îstînaz zî qerarê mehkemeya herêmî testîq kerde û dewa ameye redkerdene.

‘No talîmatêk o’

Qerar hetê tornê Şex Seîdî Kasim Firatî ra ame erjnayene. Firatî dîyar kerd ke hetêk ra Wezaretîya Karanê Teberî wazena dewa bêra redkerdene û hetêk ra qeyûmê Beledîyeya Amedî nameyê Şêx Seîdî dano bûlvarêk. Firatî va, “Verê weçînayîşî şonê nameyê Şêx Seîdî danê bûvarêk. Na dewleta nakokîyan a û komare înkar û îmhayî ser o ameya ronayene. Mabên ra 100 serrî vîyartê, 46 kesî netîceya mehkemeya bêedalete ra ameyê dardekerdiş û nika zî vanê ‘Xebera ma çin a û ma cayê ci nêzanê’. Ma bawer nêkenê ke xebera înan çin bo. No talîmatêk o.”

‘Ma do muracatê mehkemeyanê mîyanneteweyîyan bikerê’

Firatî va, “Ma do bi muracatê şexsîyî dewa bikirişnê Mehkemeya Qanûnê Bingeyî. Ez bawer nêkena ke ura ra zî netîceyêk bijevîya. Dima, ma do dewa bikirişnê mehkemeyanê mîyanneteweyîyan. Eke no zî nêbo ma do bi metodanê xo wayîrê cayanê cinazeyanê xo bivejîyê. Ê rûmetê ma yê, ma do heta peynî şorê û netîceyêk bigerê.”

MA / AMED