‘Mi bidayêne polîsî ro, mi muebbet girewtêne’

MA / Zeynep DURGUT / ŞIRNEX

Domano 7 serre Mîraç Mîroglû, bi pirodayîşê wesayîta zirxine cuya xo vîndî kerdibî. Pîyê Mîraçî va, “Eke mi bidayêne polîsî ro, mi cezaya muebbetî girewtêne.”

3yê Êlule 2021î de qezaya Hezexî ya Şirnexî de, Mîraç Mîroglû (7) wexto ke verê berê xo de bîsîklete ramitêne wesayîta zirxine da ey ro û cuya xo vîndî kerde. Dewa de vîzêrî qerar vejîya. Derheqê polîs Metîn Kîrazî de qerarê beraatî ame dayene.

Dozgerî, mutaalayê xo de pawit ke wesayîte hêdî bîya û reyna pawit ke xeta mîracî de ya û polîsî de xeta çin a.

Awiqatê keyeyê Mîroglûyî do dewa berê îstînafî. Pîyê Mîraçî Salih Mîroglûyî dîyarv kerd ke seba ke polîs ceza bigero ê do xoverdayîşê xo biramnê.

‘Ganî polîs cezaya tewr girane bigero’

Salih Mîroglûyî va, “Awiqatê polîsî mehkema de va, ‘Mîraç seba ke vejîyayo rayîrê pîlî ser wesayîte daya piro’. Labelê her kes zano ke wesayîte verê berê ma de daya Mîraçî ro. Dîmenî est ê û pêro şarê mehla şahîd o. Ez nê qerarî qebûl nêkena. Ma do heta peynîye îtîraz bikerê. Ma tazmînat nêwazenê, ma wazenê wa faîl cezaya tewr girane bigero.”

‘Qeraranê beraatî ra paştî genê’

Mîroglûyî va, “Edalet ça de yo? Eke edalet bibîyêne, np qerar nêameyêne dayene. Eke mi bidîyêne polîsî ro yan zî welatîyêk bidîyêne polîsî ro cezaya muebbetî girewtêne. No qerar, vernîya nê hedîyeyan akeno. Yeno no vate ke yewna bajar de, yewna mehla û kuçe de polîsêk bido domanêk ro do beraat bigero. Qeraranê beraatî ra do paştî bigerê.”