Îqtîdar elewî û kurdan dano koçkerdene

• Erdlerzê Meraşî de 11 bajarî binê tesîrê erdlerzî de mendê. Bi hezaran însanan dinyaya xo bedilnaye û bi hezaran însanan zî mecbûr mende ke koçe bajaranê bînan bikerê.

Parlamenterê HDPyî Mehmet Ruştu Tîryakîyî dîyar kerd ke hukmatê Erdoganî elewî û kurdan cayê ci ra dano koçkerdene û wina vat: “Bi kampanyaya ‘Keyeyo Dost’ ê partîya ma û bi paştîdayîşê şarê ma ma eşkenê vera ney bivinderê.”

Parlamenterê HDPyî Mehmet Ruştu Tîryakîyî ANFyî qisey kerd û ard ziwan ke HDP roja verêne ya erdlerzî ra yo ke goreyê erdlerzî reyna planêke viraşte û karê xo zî goreyê erdlerzî reyna plan kerdî. Tîryakîyî ard ziwan ke îqtîdar herinda ke mexdûranê erdlerzî rê hetkarî bikero, înan tena verdano û bi se hezaran însanan zî koçê bajaranê bînan kerdo û vat, ‘‘Nika seba her kesî bîyo persêk, gelo ê kesê ke koçê bajaranê bînan kerdo û ê yê ke cayê xo nêterknayê do senî reya xo bifînê. Na babete de ez verê wazena ney vaja; Nê însanî yê ke şîyê bajaranê bînan yan zî hem herême de yê, wesfê înan ê weçînitoxîye nêşîyo. Di rayîrî ê însanan ver o est ê. Yew, bajaro ke ê şîyî, qeydê xo uca de bivirazê. Bi nê hewayî cayo ke şîyê, uca de eşkenê reya xo bifînê. Yê dîyinî zî, adresê xo nêberê ê bajarî ke ê şîyê û wextê weçînitişî de şêrê herêma xo reya xo bifînê.”

Tîryakîyî bi taybetî bale ante hewldayîşê vengkerdişê herême ke ê wazenê nufusê kurd û elewîyan kêmî bikerê û vat, ‘‘Bi taybetî herêma kurd û elewîyî tede ciwîyenê, polîtîkayê teşwîqî yê koçkerdişî est ê ke şar waranê xo terk bikero. Bi kampanyaya ‘Keyeyo Dost’ ê partîya ma û bi paştîdayîşê şarê ma ma eşkenê vera ney bivinderê.’’

XWEBÛN