Iraqî waşt Tirkîya erdê ci ra bivejîya

• Wezîrê Karanê Teberî yê Iraqî Fûad Hisên va, "Tirkîya sîvîlan kişena".

Konseya Ewlekarîya Netewî ya Iraqî hêrîşa Zaxoyî ser o ameye pêser.

Tirkîya 20ê Temûze de dewêka Zaxoyî bomba kerdibî. Na hêrîşe de xeylê sîlîvî merdê û xeylê sîvîlî zî birîndar bîyê. Naye ser o Lijneya Ewlekarîya Netewî ya Iraqî bi serektîyê serekwezîr Mustafa El Kazimîyî kombîyayîşêk viraşt. Badê kombîyayîşî de malûmatêko nuştekî ame weşanayîş. Konseya Ewlekarîya Netewî ya Iraqî Tirkîya ra waşt bi resmî uzrê xo biwaza û eskeranê xo erde Iraqî ra bianca. Hetê konseye ra tayê qerarî ameyê girewtene û Tirkîya bi resmî ameye şermezarkerdiş.

Kombîyayîşî de 8 qerarî ameyê girewtiş, înan ra tayê wina yê;

*Konseya Ewlekarîye wezaretîya karanê teberî wezîfedar kerda ke derheqê hêrîşanê Tirkîya de û kerdenanê ci yê erdê Iraqî de dosyayêk hedre bikera. Ganî nê dosya Konseya Ewlekarîye ya Neteweyanê Yewbîyayîyan rê bêra erşawitiş.

*Ganî Tirkîya bi resmî uzrê xo biwaza û pêro eskeranê xo erde Iraqî ra biveja.

Fûad Hisên: Tirkîya sîvîlan kişena

Wezîrê Karanê Teberî yê Iraqî Fûad Hisên derheqê qetlîamî de çapemenîye rê qisey kerd. Fûad Hisênî va, “Pisporanê wezîfedaran qetlîamê Zaxoyî ser o cigêrayîşî kerdê. Netîceya cigêrayîşan de eşkera bîyo ke bombayî hetê artêşa Tirkîya ra ameyê eştene. Ganî Tirkîya erdê Iraqî ra vejîya. Eşkera bi ke Tirkîya PKKyî de şer nêkena. Tirkîya xeylê dewê Kurdistanê Iraqî îşxal kerdê û sîvîlan kişena. Ma do na babete bere Konseya Ewlekarîye ya Neteweyanê Yewbîyayîyan.”

HPG: Bi zanayîşî hêrîşa sîvîlan kenê

HPGyî zî derheqê qetlîamê Zaxoyî de malûmatêko nuştekî weşana. HPGyî dîyar kerd cayê qetlîamî de hêzê înan çin ê û va, “Tirkîya wazena cayanê îşxalkerdîyan de sîvîlan nêverda û înan tîya ra veja. Ganî her kes rastîya nê qetlîamî bivîno Tirkîya wazena se bikera. Seyrangehî de sîvîlî bi zanayîşî ameyê bombakerdiş. Ganî şar destûr nêdo ke Tirkîya serê nê qetlîamî bigera. No qetlîamo verên nîyo û qetlîamêko plankerde yo. Tirkîya wazena Başûrî de cayê xo qeyîm bikera. Coka bi kuştişê sîvîlan wazena ters bifîna zerrîya şarî. Tirkîya wazena sîvîlan mintiqaye ra veja. Eynî çî seba Hîrorêya Metînayî zî yeno kerdene. Hêzê ma derûdorê Hîrorêye de çin la reyna zî tîya tim hetê Tirkîya ra yeno bombakerdiş ke dewijî mintiqaye ra vejîyê.”

XWEBÛN