‘Îttîfaqê Tirkîya û Şamî do Sûrîyeyî bianco mîyanê lince’

çarşem 31 tebaxê 2022 - 16:21

  • Hetkarê Hemserekê Meclîsa Rayraberdişî ya Îdareyê Xoserî yê Bakur û Rojhelatê Sûrîyeyî Hesen Koçerî va, “Îttîfaqê Tirkîya û Şamî do ewlehîya pêro mintiqa bifîno taluke.”

Badê kombîyayîşanê Tehran û Saçîyî vera Bakur û Rojhelatê Sûrîyeyî hêrîşê Tirkîya zêdîyayê. Hêrîşanê Tirkîya ver 8 domanî merdê û xeylê kesî birîndar bîyê. Hêrîşê Tirkîya dewam kenê. Hetê Tirkîya ra ameyo eşkerakerdiş ke mabênê înan û Hukmatê Şamî de pêvînayîşî yenê kerdene.

Hetkarê Hemserekê Meclîsa Rayraberdişî ya Îdareyê Xoserî yê Bakur û Rojhelatê Sûrîyeyî Hesen Koçerî derheqê hêrîşan û rewşa mintiqaye de qisey kerd.

Rolê Rusya û Amerîkayî

Hesen Koçerî va, “Hêrîşan de gişta Rusya û Amerîkayî est a. Tim hêrîşan kenê la nêşkenê netîceyêk bigerê. Polîtîkayê Tirkîya ver krîz beno pîl. Înan hêverî mudaxeleyê şorişê Sûrîyeyî kerd. Hêrîşê verênî bi destê Daîşî ameyê kerdene. Dima Tirkîya bi xo kewt kar. Nê hêrîşî bê Amerîka nêbenê. Tirkîya nêşkena xo ser hêrîşe bikera. Çimkî sahaya hewayî kontrole Rusya û Amerîkayî de ya. Rusya zî berpirsîyara nê qetlîaman a.”

Destûro bişert

Derheqê îttîfaqê înan de Hesen Koçerî va, “Tirkîya ra ameyo vatiş ke, sehaya hewayî şima rê akerde ya, şima eşkenê bidê her cayî ro la ma destûr nêdanê şima bi eskeranê xo bikewê mintiqa. No zî hetê Tirkîya ra ameyo qebulkerdiş. Tirkîya wazena bi hêrîşan mintiqaye veng bikera û çeteyanê xo nê cayan de ca bikera. Vera Kurdan fobîyê Tirkan est o. Ça de Kurdî bimirê pê şa benê. Kerdenanê xo de hêzanê mîyannetewîyan ra paştî gena.”

Polîtîkayê Rejîmî

Koçerî va, “Mabenê MÎT û îstîxbaratê Sûrîyeyî de zaf verî ra nat têkilîyêk est a. Seba înan taluke Îdareyo Xoser o. Tirkîya û Rejîm Îdareyê Xoserî sey dişmenî vînenê. Na mesele de şerîk ê. Wazenê Îdareyê Xoserî zeîf bikerê û çin bikerê. Ez nê îttîfaqî tena nêbestena na mesele. Erdoganî verî cû vatibi, Esad dîktator o, 100 kesî qetil kerdê. La çi wext ke planê înan puç bîyê, vejîya va, Sûrîyeyî de meseleya ma çin a, tena tayê hêzan reyde meseleya ma est a. Çerx da û na dirîye ya. Yew dewlete seba ke hêrîşa ci bikera nêşkena dewletêk de îttîfaq bikera. Ganî rejîm bizano ke Tirkîya de îttîfaq bikero, Daîşî de îttîfaq keno.”

‘Tirkîya ganî Sûrîye ra bivejîya’

Dewamê qiseykerdişê xo de Hesen Koçerî va, “Her hêrîşa Tirkîya de Daîş newe ra beno gande. Wa no weş bêro famkerdiş. Coka ma vera nê îttîfaqî vejîyenê. Kes nêşkeno bin ê îttîfaqî ehlehî û îstîqrarê Sûrîye ra behs bikero. No îttîfaq zaf talukeyin o. Tirkîya ganî Sûrîye ra bivejîya. Şorê biewnê cayê ke binê destê Tirkîya de yê çi hal de yê. Ziwan Tirkî yo, hişmendî Tirkî ya, pere zî pereye Tirkan o. Tena teslîmkerdişê sînorî mendo. Ma nêwazenê Sûrîyeyî lete bikerê. Ganî Hukmatê Şamî sîyasetê ma û felsefeyê ma weş fam bikero.”

‘Ewlehîya dinya do bikewa taluke’

Hesen Koçerî peynî de va, “Ma ganî şerê şarî yê şorişgerî hîra bikerê. Eşkera yo ke hêzê mîyannetewîyî do ma mepawê. O wext ganî ma xo bipawê. Ganî şarê ma erdê xo terk mekero. Wazenê bajaran veng bikerê û bi hêzêka pîle hêrîşe bikerê. Ver ama şerêko taybet yeno ramitene. Ma bêrûmetîye qebul nêkenê. Ma vanê eke ewlehîya Bakur û Rojhelatê Sûrîyeyî bixeripîya, do ewlehîya pêro dinya bixeripîya. Çimkî Daîş tîya de yo. Bi hezaran Daîşijî hepisxaneyan de yê. Ma seba ke merdimatîye bipawê, 12 hezar şehîdî dayê. La eke ewro dinya vera nê hêrîşan bêveng bimana, tena ewlehîya Sûrîye ney ewlehîya pêro dinya do bikewa taluke.”

MERKEZÊ XEBERAN

 

 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.