Kampanyaya ‘Abdullah Ocalanî rê azadîye’: Heyetêk do bierşawîyo Tirkîya

• Hatîp Dîcleyî va, “Na kampanyayêka derg a. Hedef wedarnayîşê tecrîdî û peydakerdişê azadîya fizîkîya Ocalanî yo.”

MA / Esra Solîn DAL

10ê Teşrîna Verêne de, bi şîarê ‘Abdullah Ocalanî rê azadî, meseleya Kurdan rê çareserî’ kampanyayêk dîyaye dest pêkerdene. Tedeyîya kampanyaye de xeylê çalakîyî yenê kerdene. Verfekê Platformê Abdullah Ocalanî rê Azadî Meseleya Kurdan rê Çareserî Hatîp Dîcleyî dîyar kerd ke kampanya hîna destpêkêk a.

Heyetêk do bêro Tirkîya

Dîcleyî dîyar kerd ke xebatê kampanya bêmabên dewam kenê û rayîrşîyayîşî, mitîngî û konferansî ameyê kerdene. Ey dîyar kerd ke heyetêko do hiqûqnas, parlamenter û zanyaran ra yeno pê bêro Tirkîya û îdarekaran de pêvînayîşan bikerê.

‘Paradîgma do birasa her ca’

Dîcleyî dîyar kerd ke do bin ê xebatan paradîgma û pawitoxîyê Abdullah Ocalanî birasê her ca û va, “Nika embazê her welatî wayîrê înîsîyatîfî yê. Na hamle tek merkez ra îdare nêbena. Rayberê senqîqayanê karkeran ê Îngîltereyî serkêşê na kampanya yê. Înan verî cû seba azadîya Nelson Mandela zî kampanyayêk viraştibî. Na ekîbe pêro dinya de yena şinasnayene. Ma Kurdî, dostê Kurdan, hemrayê Abdullah Ocalanî înan teqîb kenê.”

‘Mefteyê haştîye Abdullah Ocalan o’

Ey dîyar kerd ke çareserîya meseleya Kurdan û azadîya Abdullah Ocalanî kewtê têzere û va, “Ocalan ke mebo, meseleya Kurdan nîna çareserkerdene. Abdullah Ocalan mefteyê haştîye yo. Coka, çareserîya meseleya Kurdan û azadîya Ocalanî kewtê têzere.”
‘Ganî seba azadîye şar wirzo payan ser’

Dîcleyî bale ante çalakîya greva veşanîye ya girewteyan ser o û dîyar kerd ke a zî leteyê hamleye azadîye ya. Dîcleyî peynî de va, “Ma hêvî bikerê ke wa dewleta Tirke narey xesasîyet ramojna. Ganî her kes seba azadîya Ocalanî wirzo payan ser. Ez bawer kena ke do şarê ma heta peynîye paştî bido kampanya. Ma eşkenê pêro pîya serbikewê. Ma eşkenê Rayber Ocalanî birasnê azadî. No do paştî bido xoverdayîşê azadîye û çareserîya meseleya Kurdan rê destegîr bibo.”