Karakuş: Îqtîdar do 14ê gulane de bin bikewo

Hemserekê Şûbeyê Wanî yê Komeleya Heqanê Merdiman(ÎHD) Mehmet Karakuşî ANFyî rê qisey kerd û vera operasyonanê destbendkerdiş-tepiştişî yê îqtîdarî nêzabîyayîşê xo mojna. 

Hemserekê ÎHDyî yê Wanî Mehmet Karakuşî da zanayene ke îqtîdar keno ke pê operasyonan verê têgêrayîşê sîyasî yê kurdan bigêro û wina vat: “La rixmê ney zî 14ê gulane de ancî do bin bikewo.”

Karakuşî da zanayene ke cara weçînayîşan ra verî înan AKP-MHPyî ra nê operasyonî pawitêne û vat: “Îqtîdar keno ke weçînayîşan ra verî tedaya têgêrayîşê sîyasî û hêzanê muxalîfan bikero. Îqtîdar destkarîya muhakemekerdişî keno. Tewr peyên derheqê 250 kesan de bira destbendkerdişî dîyaye. Îqtîdar keno ke pê nê kerdişan verê têgêrayîşê sîyasî yê kurdan bigêro. Îqtîdar xîret keno ke pê operasyonanê qirkerdişê sîyasîyî komelî bifetisno la rixmê ney zî 14ê gulane de ancî do bin bikewo.”

Karakuşî vist vîrî ke îqtîdarê AKP-MHPyî verê cû zî muracatê metodanê winayênan kerdbî û vat: “Bi hêrişê vera heqanê merdiman serkewtiş nêbeno. Ê wazenê avûkatan, sîyasetmedaran, hunermendan, rojnamegeran rojdemê weçînayîşan ra durî bivisnê. Operasyonî beno ke dewam bikerê. Îqtîdar armanc keno ke beşdarîya bi weçînayîşan asteng bikero. La nê kerdişî binpaykerdişê heqanê merdiman o. Coka kesê ke ameyê destbendkerdene û tepiştene wa cade vera bidîyê.”

XWEBÛN