Rêxistinê Komelê Sivîlî: Wa bêhiqûqîyê biqedîyê

• Rêxistinanê Komelê Sivîlî, bi wesîleyê Hefteyê Heqanê Merdiman seba ke bêhiqûqîye biqedîyê gazîye kerde.

Hetê Komeleya Heqanê Merdiman, Baroya Amedî, OHD, Komeleya Cinîyan a Rosa, TJA, MED UHAD-FED, MED-DER, HDP, DBP û xeylê sazîyan ra, bi wesîleyê Hefteyê Heqanê Merdiman vernîyê Hepisxaneyê Dyî yê Dîyarbekirî de malûmato şerîk ame dayene. Malûmato şerîk hetê Hemserekê MED-DERî Rifat Ronîyî ra ame wendene.

‘Binpaykerdişê heqê cuye’

Rifat Ronîyî va, “Hepisxaneyanê Tirkîya de heqê sihetî yeno astengkerdiş. Muayeneyo kelemçeyen yeno ferzkerdiş, sewqî erey vejîyeyenê, personelî kêmî yê û înan ver zî heqê cuye yeno binpaykerdiş. Girewteyê nêweşî nêşkenê tedawî bibê, tehlîya nêbenê û hepisxane de mirenê. 2022yî de 50 kesî hepisxaneyan de merdê û 2 kesî zî badê tehlîyabîyayîşî merde.”

‘Ganî înfazê înan taloq bibo’

Ronîyî va, “Girewteyê nêweşî yê giranî ganî bi raporêk bêrê veradayîş, tedawîyê înan keyeyanê înan het de bêro kerdene û sîgortayê înan yê sihetî hetê dewlete ra bêro dayene. Ganî ATK sey sazîya tek memana ke raporan hedre bikera. Ganî raporan de teqdîrê sawcîyan û emnîyetî wedarîyo û tena raporê sihetî esas bigêrîyo. Ganî bi qanûnî rewşa girewtîyanê nêweşan de vurînayîşî bibê.”

‘Neqlî ganî keyeyan ra nêzdî bêrê kerdene’

Derheqê neqlanê girewtîyan de Ronîyî va, “Yeno vînayene ke neqlî keyeyan ra dûrî yenê kerdene. Ganî girewteyî keyeyanê xo ra nêzdî bê ke bieşkê keyeyanê xo de pêvînayîşan bikerê. Înfazê xeylê girewteyan yeno vêşnayene û heqê tehlîyeya înan yeno astengkerdiş.”
‘Ganî cade bêrê veradayîş’

Rifat Ronîyî peynî de va, “Yeno vînayene ke, waştişê tehlîyaya şertine yenê redkerdene. No proses bi temamî keyfîyetê îdarekaran rê ameyo verdayene. Kesê ke heqê tehlîyeya înan bêhiqûqîye yeno astengkerdiş, ganî cade bêrê veradayîş.”

MA / AMED