NY ra raporê Sûrîyeyî: Tirkîya bi SÎHAyan sivîlan qetil kena

Hetê Komîsyonê Cigêrayîşanê Sûrîyeyî yê NYyî ra raporê Sûrîyeyî weşanîya û ame dîyarkerdiş ke Tirkîya Rojava de bi SÎHAyan sivîlan qetil kena.

Komîsyonê Neteweyanê Yewbîyeyan ê Sûrîyeyî, Ofîsê Cenevreyî de kombîyayîşo çapemenî viraşt û raporê Sûrîyeyî yo 1ê Çeleyî û 30ê Hezîrane ame eşkerakerdiş. Rapor do Roniştişê Heqanê Merdiman ê 53yinî de bêro erjnayene.

‘Sûcê şerî yenê kerdene’

Serekê komîsyonî Paolo Pinheiroyî va, “Sûrîye de şîdet zêdîyeno. Merdimî yenê remnayene, îşkenceyî yenê kerdene, merdimi yenê vîndîkerdiş û yenê înfazkerdiş. Sûcê vera merdimîye û sûcê şerî ameyê kerdene.”

‘Wa endamê DAÎŞî sey sûcdarê jenosîdî bêrê mehkemakerdiş’

Pinheiroyî bale ante girewteyanê endamanê DAÎŞî û rewşa kampanê El Hol û Rojî ser o û gazîye kerde ke wa dewletî hemwelatîyanê xo bigerê. Ey va, “Wa dewletî hemwelatîyanê xo yê camêrdan ke Bakûr û Rojhelatê Sûrîyeyî de girewteyê bigerê. Wa endamê DAÎŞî, sûcanê vera merdimîye û jenosîdî ra bêrê mehkemakerdiş.”

‘Sivîlan qetil kena’

Raporî de ame dîyakerdiş ke netîceyanê hêrişanê Tirkîya yê Heleb, Hesekê, Reqa, Eyn Îsa û Til Temirî de sivîlî ameyê qetilkerdiş. Reyna ame dîyarkerdiş ke tarîxanê cîyayan de bi SÎHAyanê Tirkîya Rojava de sivîlî ameyê qetilkerdiş. 

Raporî de ameyo vîrardene ke 20ê Hezîrane de Hemsereka Kantonê Qamişloyî Yusra Derwêş, hektara ci Leyman Şiwêş û şofor Firat Tuma hêrişa SÎHA de cuya xo vîndî kerde û ame vatiş ke, “Dewleta Tirke sivîlî cîya nêkerdê, cayê sivîlî cîya nêkerdê û hêrişê xo ramnayê.”

‘Kurdî raştê îşkenceyanê giranan yenê’

Ameyo dîyarkerdiş ke hetê Tirkîya û paramîlîteranê ci ra Kurdî bi keyfî gêrîyenê binê çimî û raştê îşkenceyanê giranan yenê. Ameyo dîyarkerdiş ke qereqolanê Serêkanîyê û Girê Spîyî de hema zî berpirsîyarê eskerî yê Tirkan estê û hetê înan ra sivîlanê Kurdan rê îşkenceyê giranî yenê kerdene.

Ameyo dîyarkerdiş ke cayanê îşxalbîyayîyan de sûcê şerî ameyê kerdene û reyna ameyo vatiş ke nê sûcan ra Tirkîya zî berpirsîyar a.

MERKEZÊ XEBERAN