Koma Amed newe ra ameye têhet

Endamanê Koma Amedî dîyar kerd kê, ê do reyna xebatanê xo pîya biramnê.

Koma Amed dîyar kerd ke, serran ra têpîya ê kome reyna ameya têhet. Endamê kome Memo Gulî va, “Sey Koma Amedî nere ra têhetameyîşê ma hem goşdaritoxanê ma de hem ma de heyecanêko pîl peyda kerd. 

Kome dîyar kerd ke, Serhat Çarnewa, Suleyman Çarnewa, Memo Gul û Mazlûm Rewşen do pîya xabatanê xo biramnê. Înan deyîra ‘Êvarê’ vate û pare kerde.

‘Serranê 90an ra heta ewro Koma Amed’

Evdilmelîk Şêxbekir Rojava ra yeno Hecettepe de Tip waneno. Tîya de Gulşen Çetîn, Savaş Çakmak, Rohat Kutlay, Fîkrî Kutlay, Mustafa Kart û Ahmet Kayayî şinasneno. Ê zî wendekarê tibî yê. Bingeyê kome aye ra têpîya yeno eştene. 

Koma Amed, bi Koma Dengê Azadî komanê verênan ra ya. Xebatanê nê koman de muzîko tradîsyonel û modern têmîyan bî. 

Albumê verên ê kome Kulîlka Azadî de Evdilmelîk Şêxbekir, Gulşen Çetîn, Savaş Çakmak, Rohat Kutlay, Fîkrî Kutlay, Mustafa Kart û Ahmet Kaya estîbî. Peydakerdişê studyo de zehmetî estîbî. Deyîra Bella Ciao(Çav Bella) hetê Şêxbekirî ra açarîyaye Kurdkî û nê albumî de ca girewte. Endamê kome dima şîyê Îstanbûl û înan MKM de xebatê xo ramitê. Serhat Karakaş, Merdan Zirav, Memo Gul, Mehmet Kaya, Bîrkan Çelîk û dima zî Serap Sonmez, Suleyman Gultekîn û Leyla bîyê beşdarê kome.

Kome, bi albumê Dergûşî hîna zêde ameye şinasnayîş. Kome muzîkê Kurdkî yê tradîsyonelî ra vejîyaybî teber û tarzêko cîya amebi awankerdiş. 3 albuman ra dima, çend endeman sebebabê sîyasîyan ra îltîcayê Almanya kerdibî û kome vila bibî. Dima hetê çend endamanê kome ra, bi nameyê ‘Çernewa’ komêk ameybî ronayene.

PÎRHA