Komploya mîyannetewî do serra xo ya 25ine de Cenevre de bêra protestokerdene

Ergîn ÇAGLAR / MA / AMED

Hemserekê CDKyî Mehmet Latîf Çelebîyî va, “Mefteyê çareserîye Îmrali de yo.”

25ê Çeleyî yê 2021î ra nat Cenevre de seba azadîya fizîkî ya Rayberê PKKyî Abdullah Ocalanî çalakîyî yenê kerdene. Nê çalakîyî hetê Komelê Demokratîkî yê Kurdî(CDK) ra yenê organîzekerdene. Hetê CDKyî ra do serrgêra komploya mîyannetewî de xeylê çalakîyî bêrê kerdene. 10ê Teşrîna Verêne de do Cenevre de û 7 merkezanê Swîsreyî rayîrşîyayîşî bêrê kerdene. 

Hemserekê CDKyî Mehmet Latîf Çelebîyî va,”Seba ke Birêz Ocalan vera şerî paradigmaya demokratîke awan kerde raştê komplo ame. 3 serrî yo ci ra xebere nîna girewtene. Wazenê têkilîya ci û şarî bibirnê. Nê pêroyî dewamê komplo yê.”

Netîceyê tecrîdî

Çelebîyî va, “Bado ke tecrîd kewt dewre; vera rêxistianê sivîlan, sîyasetmedaran, rojnamegeran, awiqatan, roşnvîran û haştîwaştoxan operasyonê binçimgirewtişî û girewtişî kewtê kar. Başûr, Mexmûr, Rojava, Şengal û Waranê Pawitişî yê Medya rê hêrişî bîyê. Wazenê bi tecrîdî têkilîya Birêz Ocalanî û şarî bibirnê. Hêzê mîyannetewîyî zanê ke eke Rayber Apo azad bibo û vengê ci biraso şarî, no yeno vateyê azadîya şarê Kurdî û azadîya şaranê Rojhelatê Mîyanênî.”

Bêvengîya sazîyanê mîyannetewîyan

Çelebîyî derheqê bêvengîya NY, YE, CPT û AÎHMî de va, “Mesele ke bibo Rayberê Şarê Kurdî Abdullah Ocalan, her kes kerdenan vîneno, eşnaweno la vengê xo nêkeno. Vera nê polîtîakayan do çalakîyê ma ten abi nobetan sînordar mebê. Serrgêra 25ine ya komplo de, ma do çalakîyanê taybetan bikerê. Ma do bi nê çalakîyanê xo tecrîdî teşhîr bikerê. Heta ke ma netîceyêk bigerê, çalakîyê ma do dewam bikerê. Çareserîya meseleya Kurdan û mefteyê haştîye Îmrali de yo.”