Kurdî Newroza Dîyarbekirî de reyna bîyê laser û horês

• Polîsan gaz eşt, awe eşt, berî girewtê la şar bi laser û horês herikîya meydanê Newroze.

Newroza emserî de raşta zî qerelalixêko bêemsal estibi. Kurdî bi seyan serran ra nat wayîrê kultur û edetanê xo vejîyenê. Newroze sey çakuçê Kawayê Asinkarî tim destê Kurdan de yo, tim hewa ra yo û zixm o. Bi tank û topan adirê Newroze hewna nêşino.

Ê kincanê Kurdan ra zî tersenê

Hinî sîstemê Tirkîya hende bîyo paranoyak ke, ê kincanê Kurdan ê gelêrîyan za zî tersenê. Emser Newroza Dîyarbekirî de xeylê Kurdî kincanê xo yê gelêrîyan ver nêgerîyeyê zere. Goreyê malûmatan, polîsan vato şima nêşkenê kincanê gelêrîyan xora bide çimkî gerîllayî zî înan danê x ora. Seke sîstemêk mezgê înan de ameyo cakerdiş û wexto ke Kurdan vînenê seke zombîyan bivînê wina tersenê û zordarî kenê. Çîyo ke fam nêkenê no yo, Kurdî mergî ra nêtersenê û xoverdayîşê înan do timûtim sey adirê Newroze gurr bimano.

Peynîya înan nêzdî ya

Raşta zî Newroza Dîyarbekirî ya emserî de polîsan şarî rê xeylê heqeretî kerdê. Şar bi qasê saetan ame vindarnayîş. Rîyê polîsan ra ters û nefret ameyêne wendene. Heta reyna goreyê malûmatanê şarî, polîsan xo mîyan de vato, eke ma verdê saatêk de mîlyonî ra zêder însanî yenê pêser. Polîsan dî ke şar rike keno, înan gaz eşt, tomayan awe verda şarî ser la şarî xo pawit û cewabê înan da. Peynîye de ê mecbûr mendê beran akerê. Kurdan heta şan meydanê Newroze de bi şayî û keyfî ya roşanê xo pîroz kerd. Wexto ke qerebalix vila bi, polîsan eşt qerebalixî ser û 298 kesî gêrîyayê binê çimî. Zaf eşkera yo ke peynîya înan nêzdî ya û na barbarîya înan zî naye ra qewimîyena. Ganî hinî ê fam bikerê ke qet yew çî nêşkeno vernîyê Kurdan bigero, Kurdî do bibê laser û horês biqilîyê înan ser.

AMED