Newroza Rojawanî de mesajê xoverdayîşî û azadîye

Bajaranê Rojawanî Qamişlo, Kobanê, Reqa û Hesekê de şarî Newroze bimbarek kerde, mesajê xoverdayîş û azadîya Abdullah Ocalanî dayî.

Newroza Qamişloyî de Endama Konseya Serekîye ya PYDyî Foza Yûsife qisey kerd. Yûsife ard ziwan ke înan semedê caardişê projeyê netewa demokratîke kerdo xo çeng û vat: “Rayber Apo 50 serrî yo semedê ma têkoşîn keno. Sîstemê Îmraliyî vera heme şaran o. Ma do bi Newroza emseri nê sîstemî bişiknê, waranê îşxalkeran bikerê azad.”

Foza Yûsife  veng da heme partîyanê kurdan ke semedê xeripnayîşê Pêkerdişê Lozanî wa têkoşînê hemparî bikerê.
Hesekê de şarî vera hêrişanê îşxalî û tecrîdê Îmraliyî hêrsê xo ard ziwan û vat ê do bi hawayêkê qerardarî têkoşînê xo bidomnê û tewr peynî de vera îşxalkeran ser bikewê.

Kobanê de zî bi hezaran kesê ke tewrê şayîya Newroze bîyî, vat ê do bi ruhê xoverdayîşî yê Newroze verê îşxal û qirkerdişan bigêrê.
Reqa de şaro ke warê Newroze de ame pêser vat do semedê azadîya fîzîkîye ya Abdullah Ocalanî têkoşîn bêro xurtkerdene.

XWEBÛN