Ma wazenê beranê Îmraliyî akerê

• Parlamenterê HDP´yî Omer Ocalanî va, “Ma îltîmasêk nêwazenê, sey keyeyî ma wazenê heqanê xo yê qanûnîyan bigurînê.”

Nobeta Edaletî ya ke vera tecrîdî hetê parlamenteranê HDPyî ra yena girewtene dewamkena. Hetê parlamenteranê HDPyî ra malûmatêk ame dayene.

Parlamenterê HDPyî yê Rihayî Omer Ocalanî dîyar kerd ke 24 serrî yo ke tecrîd yeno ramitene û va, “Tewr peynî 25ê Adare 2021î de edlîyeya Rihayî de pêvînayîşê telefonî ame kerdene. 3 serrî yo ke rî bi rî pêvînayîşî nêbîyê. Eke hiqûq esto, qanûn esto û eke na dewlete dewleta hiqûqî ya çira hiqûq vera Birêz Ocalanî nîno ramitene. Hetê îqtîdarê faşîstî ra, 2015î ra nat vera Kurdan, vera Birêz Ocalanî û vera sîyasetê demokratîkî qanûnî wedarnayê.”

Tecrîdî ver krîzî benê giran

Ocalanî va, “Her het ra krîzî giran benê û tenganîye zêdîyena. Îqtîdarê AKP-MHPyî bi polîtîkayanê şerî pay ra maneno. Ma eşkera vanê, meseleye sey meseleya Kurdan bi rayanê demokratîkan çareser benê. La AKPyî xo şaş kerdo. Wa şarê ma pêbihesîyo. Ma do hesabanê neheqîyan bipersê. Hiqûq yeno binpaykerdiş û şar raştê zulmê îqtîdarî yeno.”

‘Berpirsîyarê mergan AKP-MHP yê’

Ocalanî pêvînayîşê 2013-2015î yê Îmraliyî ardê vîrî û va, “Mabênê ê 2 serran de kes nêmerd û weşîye ameye awankerdiş. Çira tersenê ke Birêz Ocalanî reyde bikewê dîalog. Bi dîalogan do vernîya sîyasetê demokratîkî abiba. AKP û serekê ci şewêk va ma qebul nêkenê. Pêvînayîşê Dolmabahçeyî ame redkerdiş. Berpirsîyarê krîz û mergê ke 2015î ra nat benê faşîzmê AKP-MHPyî yo.”

‘Beranê Îmraliyî akerê’

Ocalanî peynî de va, “Beranê Îmraliyî akerê. Sey keyeyî ma wazenê heqanê xo yê qanûnîyan bigurînê. No hem problemo hiqûqî yo hem hem problemo sîyasî yo. Ganî awiqatî pêvînayîşan bikerê. Seba ke krîzî wedarîyê ganî pêvînayîşî bibê. Heta ke ma heqê xo bigurînê, ma do xoverdayîşê xo biramnê.”

MA / ENQERA