Meclîsa Cinîyan a HDPyî: Ma do nê îqtîdarî ra hesab bipersê

• "Bi gerewtişê Semra Guzele îqtîdar vera Kurdan dişmenîya xo ramneno."

Verfekê Meclîsa Cinîyan a HDPyî Ayşe Acar Başarane va, “Bi gerewtişê Semra Guzele îqtîdar vera Kurdan dişmenîya xo ramneno. Kurdî û cinîyî sere nênanê ro. Ma do îqtîdarî va heseb bipersê.”

Destpanênayîşê parlamentera HDPyî ya Dîyarbekirî Semra Guzele 1ê Adare de ameybi wedartiş. Hetê Sawcîtîya Enqerayî ra derheqê aye de dewayêk ameybî akerdiş. Semra Guzele 2ê Êlule de Îstanbûl de gêrîyaye bînê çimî. 3ê Êlule de polîsan Semra Guzele berde Edlîyaya Çaglayanî û polîsan waşt sereyê aye ronê û raştê muameleyê kelepçeyi ameye. Semra Guzele sereyê xo nêna ro û bi îdîayê endamîya rêxistinî ameye girewtene.

Nê kerdenî û girewtişê Semra Guzele xeylê cayan de protesto bîyê. Bi rayberîya Platformê Cinîyan ê Dîcle Amedî partîyanê sîyasîyan û dezgeyan Parka Rojavayî ya Dîyarbekirî de ameyê pêser û tîya de malûmatêk ame dayene. Înan va, “Semra Guzele îradeyê şarî ya, şima nêşkenê sereyê ra ronê”.

‘Wazenê Kurdî sereyê xo ronê’

Verfekê Meclîsa Cinîyan a HDPyî Ayşe Acar Başarane va, “2015î ra çarreserîya meseleya Kurdan de rayîrê demokratîkî dîyayê kiştêk û wazenê bi polîtîkayanê îmha û asîmîlasyonî îradeyê Kurdan bişiknê. 2 rey qeyûmî erzîyayê beledîyeyanê ma ser û wekîltîya xeylê wekîlanê ma ameye betalkerdiş. Aktorê kampanyaya linçi eynî yê. Îqtîdar ver bi rijîyayîşî de yo. Wezîrê Karanê Zereyî bîyo wezîrê karanê sûcî. Nêşermîyenê û hema zî hêrîşa partî û şarê ma kenê.”

‘Vera Kurdan dişnenetî kenê’ 

Dewamê qiseykerdişê xo de Başarane va, “Wazenê mîyanê krîzan ra bi dişmenîya Kurdan bivejîyê. Înan waşt sereye Semra Guzele ronê la sernêkewtê. Semra Guzele sereberz a û îradeyê mîlyonan a. Cinazeyî mîyanê tewreyan de yenê dayene, hepsîyê nêweşî nînê veradayîş û îradeyê şarî yeno binpaykerdiş. Vera Kurdan dişmenetî kenê.”

‘Ma do îqtîdarî ra hesab bipersê’

Ayşe Acar Başarane peynî de va, “Kurdî û cinîyî sere nênanê ro. Ma do nê îqtîdarî ra hesab bipersê. Semra hema zî wekîl a. Kesê ke vengê xo nêkenê leteyê nê şermî yê. Înan waşt sereye aye ronê la aye sere nêna ro. Semra Guzele îradeyê şarî ya.”

MA / AMED