Merdimê girewteyan: Meşte beno ke erey bo

Merdimanê girewteyanê ke kewtê grevê vêşanîye dîyar kerd ke beno ke meşte erey bo û înan dîyar kerd ke ganî her kes wayîrê waştişanê înan bivejîyo.

Hepisxaneyan de bi waştişê ‘Abdullah Ocalanî rê azadî, meseleya Kurdan rê çareserîya sîyasî’ çalakîya grevê vêşanîye yena kerdene û çalaki 16 rojî yo dewam kena. Merdimanê girewteyan dîyar kerd ke ganî paştî bidîyo waştişanê girewteyan.

Birayê girewte Îsa Îpeklî yo ke Hepisxaneyê Sîlîvrîyî de yo Alî Îpeklîyî dîyar kerd ke şîyo zîayretîya birayê xo û qawişê înan de grevê vêşanî bidore dewam keno. Îpeklîyî va, “Eke heta aşma Sibate Ocalanî ra xebere meyera girewtene do grevê vêşanîye bêdore dewam bikero. Girewteyî teber ra zaf çî pawenê. Ma zî do çi ma dest ra yeno bikerê.”

‘Pêro hepisxaneyan de tecrîd est o’

Îpeklîyî dîyar kerd ke tecrîd pêro hepisxaneyan ra vila bîyo û binpaykerdişî zêdîyayê. Îpeklîyî va, “2 girewte yê ke qawişê birayê mi de yê 32 serrî yo hepis de yê. Mudeyê înan debîyo la înfazê înan ameyo taloqkerdiş û dîyar nîyo ke do key bivejîyê. Man ê prosesî vînenê û ma şahidê nê çîyan ê. Grevanê verênan de 7 girewteyan cuya xo vîndî kerdibî. Ma nêwazenê reyna facîayêka winasî biqewîmîya. Eke grev do biçarîya bêdore do xeylê kesî cuya xo vîndî bikerê.”

‘Beno ke meşte erey bo’

Waya girewte Erdal Ozelî Kumru Akgule va, “Wa hepisxaneyan ra hinî tawutî nêvejîyê. Hepisxaneyan de domananê ma kişenê û vanê înan întîxar kerdo. Hinî bes o. Ma ganî vengê xo berz bikerê. Ma ke bibê yew kes nêşkeno vernîya ma de vindero. Ez paştî dana Nobetanê Edaletî yê dayîkan.”

MA / ÎSTANBÛL