Muslim: Muqavele pozîtîf o

çarşem 3 tebaxê 2022 - 17:02

  • Hemserekê PYDyî Salih Muslîmî va, “Ma hêvî kenê ke kombîyayîşê Soçîyî de Rusya tawîz medo Tirkîya.”

EHMED SEMÎR / SILAVA EBDUREHMAN / ANHA

PYD û Hereketê Şorişger ê Sûrîyeyî mîyan de 24 Temûze de seba ke pîya xebatanê xo aver de berê muqaveleyêk îmza kerde. Salih Muslîmî derheqê hedrekerdiş û meqsedê muqaveleyî de qisey kerd.

‘Ma seba dewa û projeya xo xoverdayîşo sîsayî ramenê’

Salih Muslîmî va, “2005î de wexto ke Îlanê Şamî awan bi, ma waşt beşdarê ci bê la ma nêameyê qebulkerdiş. Kurdî sey parçekerdoxan ameyê dîyayene. Sereyê şorişî de Heyet Tensîq El-Watanî ame ronayene. Mîyanê heyetî de partîyê şorişgerî estibî. PYD zî tîya de cayê xo girewt. Tayê partîyan îqtîqarî waştêne la ma waştêne projeya Sûrîyeyê demokratîkî biramnê.”

‘Xeylê kesan dî ke projeya ma rast a’

Derheqê hêrîşan de Salih Muslîmî va, “Çeteyan hêrîşa mintiqaya ma kerde la ma xeta xo ya 3yine ra fek ranêverda. Hinî xeylê kesan dî ke seba ke Sûrîyeyî de meseleyi çareser bibê projeya ma rast a. Coka xeylê partî û hereketî ma de kewenê têkilîye. Muqaveleyo ke Hereketê Şorişger ê Sûrîyeyî reyde ameyo viraştene verên nîyo. Ma verî cû zî zere û teber de muqaveleyî viraştibî.”

‘No muqavele zaf muhîm o’

Muslîmî va, “Pratîkê projeya ma ke vejîyê meydan, muqaveleyî ameyê viraştene. Verî zî partîyê Sûrîyeyî ameybî zîyaretîya ma. Na proje tena seba ma ney, seba pêro Sûrîyeyî ya. Ma wazenê cayanê rejîmî de xoverdayîşî bêrê kerdene. Ganî ê cayan dezaf xebatî bêrê kerdene.”
‘Ganî Qanûno Bingeyin o newe bêrê viraştene’

Muslîmî dewamê malûmatê xo de va, “Rejîm wazeno agêro verê 2011î û ma zî vanê qanûnanê rejîmî ver krîzê Sûrîyeyî vejîya. Ganî bi qereranê şerîkan sîstemêko newe bêro awankerdiş. No zî Sûrîyeyo demokratîk o. Ganî qanûno bingeyin bêro vurînayîş û hetê her kesî ra bêro qebulkerdiş. Ma ganî Sûrîye de pîya bicuwîyê. Ganî xeletîyî bêrê rastkerdiş.”

‘Ma hêvî kenê ke Rusya tawîz medo Tirkîya’

Derheqê kombîyayîşê Soçîyî de Muslîmî va, “Mabênê Rusya û Kurdan de têkilîyê tarîxîyî estê. Rusya wexto ke hema nêkewtibi mîyanê krîzê Sûrîyeyî, pêvînayîşê ma estibî. Rusya projeya ma qebul keno û wazeno mabênê ma û Şamî de têkilîyan rono.”

‘Ganî sehaya hewayî bêra padayîş’

Salih Muslîmî va, “Sehaya hewayî hetê koalîsyonî û Rusyayî ra yena kontrolkerdiş. Eke sehaya hewayî bêra padayîş, Tirkîya do nêeşka çîyêk bikera. Şar seba ke xo bipawo hedreyîyan keno. Ma hêvî kenê ke Rusya narey Soçî de tawîz medo Tirkîya û mevajo cayo ke wazena bomba bike. Ganî Rusya çîyêko winasî mekero.”

‘Ma tena xo pawenê’

Serekê PYDyî Salih Muslîmî peynî de va, “Xoverdayîşê ma rameno û ma kesî de dişmenî nêkenê. Ma tena xo pawenê û no zî heqê ma yo. Ma kesî reyde îttîqaf nêviraşto ke ma bipawê. Hêrîşî dewam kenê û ma zî xo pawenê. Ganî hêzê mîyannetewî û hêzê zereyî ma fam bikerê û waştişanê ma biyarê ca.”

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.