Muslîm: Sûrîyeyijî eşkenê meseleya Sûrîyeyî çareser bikerê

• Hemserekê PYDyî Salih Muslîmî dîyar kerd ke, pêvînayîşanê Enqera-Şamî ra çareserîye nêvejîyena û va, “Sûrîyeyijî eşkenê meseleya Sûrîyeyî çareser bikerê.”

Hemserekê PYDyî Salih Muslîmî derheqê pêvînayîşanê Enqera û Şamî de û kombîyayîşê Rihayî de ANFyî rê erjnayîşî kerdê. Muslimî va, “Mîyanê nê di cîhetan de probleme pîlî estê. Nê problemî cade safî nêbenê. Rusya goreyê îhtîyacîyanê xo têgêrena û Tirkîya seba weçînitişî hamleyêk kena û wazena Esadî reyde bêra têhet. La ney ra çîyêk nêvejîyeno. Feydeyê nînan çin o.”

‘Verê weçînitişî beno ke hêrîşî bibê’

Muslîmî dîyar kerd ke, weçînitişî ver pêvînayîşî yenê kerdene û verê weçînitişî bi mehneyan eşkenê hêrîşan bikerê û va, “Nê 4-5 aşmê ke verê ma de yê zaf muhîm ê. Beno ke çîyê zaf ecêbî bibê. Rejîmêko despot esto. Merdimêk xo sey padîşahî vîneno û eşkeno her çî bikero. Nê polîtîkayan ra do xeylê zêde şarê Tirkîya zirar bivînê.”

Kombîyayîşê Rihayî

Muslîmî dîyar kerd ke, wextêkî winasî de tayê eşîran reyde Riha de kombîyayîşan kenê û va, “Ê eşîran temsîl nêkenê. Kesê pragmatîst û oprtunîst ê. Gonîya şaran ser ra bazarîye kenê. Wazenê nê cayan têmîyan bikerê. Eşîrê tîyayî leteyê sîstemî yê. Bi çend kesan pêserameyîş çîyêk îfade nêkeno. Heta nika nînan ra çîyêk nêvejîya. No organîzasyonê MÎTî yo.”

‘Sûrîyeyijî eşkenê meseleya Sûrîyeyî çareser bikerê’

Muslîmî va, “Sûrîyeyijî eşkenê meseleya Sûrîyeyî çareser bikerê. Ma her kesî ra va û ma vanê; seba pîyacuwîyayîşî çi hewce keno ma ey bikerê. Bi talîmatanê Erdoganî, Esadî, Rusya û Amerîka ney, çi ma rê lazim o ma ey bikerê. Sey PYD û Îdareyê Xoserî, qerarê ma destê ma de yo. Ma pê dîrektîfanê kesî tênêgerenê. Çil azim keno ma ey kenê. La ma kesê wayîrê îradeyî nêvînenê. Ganî qeraran de pêro Sûrîyeyijî ca bigerê. Eke nîya nêbo çareserî nêbena. No zî îrade û fikro azad wazeno. Proses seba Sûrîyeyî lêl o. Eke ma xoser û azad bê, no dem hîna beno kilm. Labelê ma vajê hela kam ma ra çi wazeno, o wext ma do vîndî bikerê.”

MERKEZÊ XEBERAN