Muslim: Bêçareserîya meseleya Kurdan do sebebê rijîyayîşî bibo

Hemserekê PYDyî Salih Muslimî derheqê hêrişanê dewleta tirke yê vera Rojawanî û rojdemê Rojhelatê Mîyanênî de ANFyî rê tayê ercnayîşî kerdî.

Hemserekê PYDyî Salih Muslimî îfade kerd ke dewleta tirke eke meseleya kurdan çareser nêkera do bi temamî birijîya.

Muslimî dîyar kerd ke bi taybetî wextê Sovyetan de Tirkîya seba NATOyî bîya welatêko girîng. Muslimî da zanayene ke sermayeya globale serranê 90an de xîret kerd ke seba xo Tirkîya de aramîyêke biaferna. Muslimî vat: “O çax Turgut Ozalî kerd ke seba plananê aramîye meseleya kurdan mîyanê Tirkîya de bêra çareserkerdene. La heyf ke no nêbî. Bingeyê pêro krîzan û bêaramîya Tirkîya de meseleya kurdan est a. Seba ke dewleta tirke na mesele çareser nêkerda asta globale de bin kewte. Sîyasetê Erdoganî yê ‘kurdî wa sîyasetê Komara Tirkîya qebul bikerê’ ra beno sebebê rijîyayîşî û netîceya nê sîyasetî de hem şarê kurdî û hem şarê Tirkîya yê bînî do bedelanê pîlan bidê.”

Muslimî bale ante şerê Îsraîl û Hamasî ser û vat: ”Seba Filîstîn û Îsraîlî modelê Îdareyê Xoserî çare yo. Ez vana hînî na meseleya Gazze do zaf çîyan bivurna. Beno ke no şer do giranêr bibo û xeylêk welatan ra vila bibo. Beno ke Lubnan, Misir û Urdun zî tewrê şerî bibê. Axir do pêro hemsengîyê Rojhelatê Mîyanênî do bivurîyê.”

XWEBÛN