Nobeta Edaletî: Tecrîdî ver şer giran beno

• Parlamenterê HDPyî Mûsa Pîroglûyî gazîye kerde ke, wa her kes vera tecrîd û polîtîkayanê şerî vengê xo berz bikero.

Nobeta Edaletî ya ke vera tecrîdî hetê parlamenteranê HDPyî ra yena girewtene dewam kena. Hetê parlamenteranê HDPyî ra verê Berê Dîkmenî yê Meclîse de malûmatêk ame dayene. 

‘Adresê çareserîye Îmrali yo’

Malûmatî de Parlamenterê HDPyî Mûsa Pîroglûyî qisey kerd û va, “Giranbîyayîşê tecrîdî yeno vateyê giranbîyayîşê şerî. Çîyo ke hetê her kesî ra yeno zanayene, hetê hukmatî ra zî yeno zanayene. Meseleya Kurdan de aderesê çareserîye Îmrali yo. Vera Birêz Ocalanî ramitişê tecrîdî yeno vateyê çareserîye ra remayîşî û şer girankerdişî. Senî ke mabênê tecrîd û meseleya Kurdan de têkilîyêka rasteraste esta, mabênê meseleya Kurdan û demokrasîyî de zî têkilîyêka winasî esta. Şer giran bibo, zorbatî û tedayî zêdîyenê.”

Derheqê ewleyîya weçînitişî de Pîroglûyî erjnayîşî kerdê û va, “Her kes vano gelo netîceya weçînitişî do bêra qebulkerdiş yan ney? La ma zanê ke, sindoqêk do bêra ronayene. Sindoqe do bêra ronayene la çîyo muhîm no yo ke, sindoqe binê kamcîn şertan de yena ronayene. Tecrîd ramojneno ke, do binê şertanê şerî de weçînitiş bêro viraştene. Ganî hetê her kesî ra bêro famkerdiş ke, heta ke şer bêro ramitene do demokrasî meyero awankerdiş, kes azad mebo û feqîrîye mewedarîya.”

‘Ganî her kes bêro têhet’

Pîroglûyî peynî de va, “Eke ma wazenê na zorbatîye û zulim biqedîyo, ma ganî raşta zî demokarsîyî û azadîye bipawê. Eke ma wazenê meseleya Kurdan bi adilane û demokratîke çareser biba, ma ganî paştî bidê şarê Kurdî. Rayîrêkî nê îmkanî esto. Ma ganî vera tecrîdî vinderî û paştî bidê ke seba çareserîye masayêka demokartîke bêra ronayene. Vera tecrîdî vejîyayîş, yeno vateyê veravejîyayîşê şerî. Ma gazîye kenê ke, wa her kes vera tecrîdî, polîtîkayanê şerî û bêçareserîye bêro têhet.”

MA / ENQERA