Norman Paechî paştî daye kampanyaya ‘Abdullah Ocalanî rê azadî’

Prof. Norman Paechî va, “Hamle ramojnena ke Abdullah Ocalan Kurdistan ra zaf dûrî de zî yeno şinasnayene.”

Serekê PKKyî Abdullah Ocalanî ra 34 aşmî yo xebere nîna girewtene. 10ê Teşrîna Ver3ene de 74 merkezî de kampanyaya ‘Abdullah Ocalanî rê azadî, meseleya Kurdan rê çareserî’ dîyaye dest pêkerdene. Pisporê Zanistê Sîyasetî û Hiqûqê Mîyanneteweyî Prof. Norman Paechî zî paştî daye na kampanya.

Paechî derheqê kampanya de cewabî dayê persanê ANHAyî. Paechî dîyar kerd ke ey û Ocalanî 1996î de Şam de pêvînayîşêk kerdo û va, “Ma o wext Konferalîzmê Demokratîkî ser o nîqaşî kerdê. Goreyê fikrîyatê ey şerî bi şeran ney bi muzakereyan qedîyenê.”

‘Tecrîdo ke yeno ramitene bêhiqûqî yo’

Paechî dîyar kerd ke tecrîdo ke Îmrali de yeno ramitene bêhiqûqî yo û ganî vera ney welatê Ewrûpa têbigêrê. Ey va, “Mehkemeya Heqanê Merdiman a Ewrûpa dîyar kerd ke 3 rey binpaykerdişî bîyê û madeyê 5. Û 6. yê muqaveleyî ameyê binpaykerdene. Çi heyf ke Mehkemaya Heqanê Merdiman a Ewrûpa nêşkena qeraranê xo tetbîq bikera. Ganî welatê Ewrûpa vera nê binpaykerdişan têbigêrê.”

Welatanê Ewrûpa rê gazîye

Paechî dîyar kerd ke kampanya ramojnaya ke vera tecrîdî xoverdayîş senî bîyo vila û va, “Hamle ramojnaya ke Abdullah Ocalan Kurdistan ra zaf dûrî de zî yeno şinasnayene. Na hamle eşkena xoverdayîşî xurtêr bikera û polîtîkayanê sergirewtişî yê dewleta Tirkan pûç bikera.”

Paechî va, “Pêro qanûnê bingeyî yê welatanê Ewrûpa de yeno dîyarkerdene ke ê girêdayîyê hiqûqî yê. Ganî seba ke Tirkîya zî goreyê hiqûqî têbigêra welatê Ewrûpa mudaxeleyanê cidîyan bikerê û na mesele de îsrardar bê.”

Paechî peynî de dîyar kerd ke seba ke Abdullah Ocalan biraso azadîya xo ya fizîkî ganî pêro hetî vengê xo berz bikerê.

MERKEZÊ XEBERAN