OHD: Tecrîdî wedarê û waştişanê girewteyan biyarê ca

Hetê OHDyî ra derheqê grevê vêşanîye de eşkerayîye ameye kerdene û gazîye ameye kerdene ke wa tecrîd wedarîyo û waştişê girewteyan biyerê ca.

Komîsyonê Hepisxaneyan ê Komeleya Hiqûsnasan a Seba Azadîye (OHD), derheqê grevê vêşanîye girewteyan de Riha de eşkerayîye kerde. Hemserekê Pêroyî yê OHDyî Ekîn Yeter û Serhat Çakmak û xeylê endamê komeleye bîyê beşdarê eşkerayîye.

Îdarekaranê OHDyî ra Ayşe Şehrîban Demîrele va, “Tecrîdo ke hetê AKP-MHPyî ra yeno ramitene, polîtîkaya înan eşkera keno. Birêz Abdullah Ocalanî ra 25ê Adare 2019î ra nata xebere nîna girewtene. Ameyo eşkerakerdiş ke hetê CPTyî ra 20-29ê Êlule 2022yî de Îmrali ameyo zîyaretkerdiş la raporêk nêame eşkerakerdiş. Tecrîdo ke Îmrali de yeno ramitene, pêro hepisxaneyan ra vila bîyo. Hetê girewteyanê sîyasîyan ra bi waştişê wedarnayîşê tecrîdî û çareserîya meseleya Kurdan grevê vêşanîye dîyayo dest pêkerdene. No grev seba ke meseleya Kurdan bi rayanê demokratîkan bêra çareserkerdene, cayêko muhîm gêno.”

Gazîya berpirsîyarîye

Demîrele dîyar kerd ke tecrîdo ke Îmrali de yeno ramitene îşkence yo û va, “No binpaykerdişê normanê hiqûqê zereyî û hiqûqê mîyanneteweyî yo. Ganî tecrîd cade bêro wedartene û waştişê girewtîyanê sîyasîyan bêrê ca. Ma rewşa înan a sihetî û şertanê hepisxaneyan nêzdî ra teqîb kenê. Ma pêro sazîyanê hiqûqî rê gazîye kenê ke w ana mesele de berpirsîyarîye bigerê. Seba wedarnayîşê tecrîdî û çareserîya meseleya Kurdan ganî pêro partîyî û sazîyî berpirsîyarîye bigerê û ganî waştişê girewteyanê sîyasîyan bêrê ca.”

MA / RIHA