Ozugurlu: AKP hêrîşan sey malzemeyê sîyasîyî gurînena

• Rojnameger Musa Ozugurluyî va, “Her kes zano ke nê hêrîşî seba ewlehîya Tirkîya nînê kerdene.”

Tirkîya wextêk ra nat vera Bakur û Rojhelatê Sûrîyeyî planê îşxalkerdişî kena û rojanê peyênan de hêrîşê xo zêdînayê. Rojnameger Musa Ugurluyî demêko derg şerî nêzdî ra teqîb kerd. Musa Ugurluyî derheqê hêrîşanê Tirkîya û rewşa mintiqaye de Ajansê Mezopotamyayî rê qisey kerdo.

Bazarî dewam kena

Rojnameger Musa Ozugurluyî va, “Hêrîşê ke rojanê peyênan de hetê Tirkîya ra yenê kerdene, hêrîşê cîya yê. Yeno famkerdiş ke mîyanê Tirkîya, Rusya û Sûrîyeyî de bazarî dewam kena. Tirkîya vera eskeranê rejîmî zî hêrîşî kerdê. Şamî va ma de cewaban bidê hêrîşanê bînan. Rusya hêrîşanê Tirkîya ra nêrehet bena û nêwazena hêrîşê Tirkîya dewam bikerê.”

Muqaveleyê Rejîm, PYD û QSDyî

Ozugurluyî va, “wextêk ra ver mabênê Hukmatê Şamî, PYD û QSDyî de muqaveleyêk ame viraştene. Goreyê muqaveleyî tayê cayan de ê do pîya têbigerê. Hêrîşê ke vera mintiqaye benê, senî ke vera pêro Sûrîyeyî bîyê do bêrê hesibnayîş. La reyna zî ma nêşkenê vajê mabênê Şamî û Kurdan de problemi ameyê safîkerdiş. No muqavele hetê konjokturî ra muhîm o. PYD verî ra hîna hêzdar û hedre yo.”

Têkilîyê Amerîka û Tirkîya

Dewamê qiseykerdişê xo de Ozugurluyî va, “Tirkîya verî ra nat hêrîşanê xo yê Sûrîyeyî de Amerîka ra paştî wazena. La hinî têkilîyê înan bîyê eşkera û vurîyayê. Eke meseleya F-16an  de Amerîka fikrê xo mevurîno, do yewnînan de sere biancê. Eke nîya bibo, Tirkîya do goş mena Rojawanî ser. La eke Amerîka mintiqaye de vera Tirkîye çîyêk bikera, o wext her çî beno cîya.”

Operasyonê verê weçînitişî

Derheqê operasyonanê Tirkîya de Ozugurluyî va, “AKP tim verê weçînitişan operasyonanê teberê sînorî kena û wazena sîyasetê zereyî dîzayn bikera. Hinî qismêko qijkek paştî dano nê operasyonan. Îqtîdar hinî sey verî nêşkeno raye bido raya pêroyîye. Her kes zano ke nê hêrîşî seba ehlehîya Tirkîya nînê kerdene. Şar zano ke nê hêrîşî sey malzemeye sîyasîyî yenê gurînayîş. Kes kuçeyan de nêvano PYD taluke yo. Şar behsê krîzî û ekonomîyî keno. Ma eşkenê vajê ke, eke Tirkîya hêrîşêka sistematik û pêroyî bikera do netîceyêka negatife bigera.”

MA / ENQERA