Parlak: Beno ke nameyê partî bivurîyo

Parlamenterê Partîya Çep a Keske yê Colemêrgî Vezîr Coşkun Parlakî derheqê ameyoxê HDPyî de ANFyî rê tayê ercnayîşî kerdî.

Goreyê parekerdişê Parlamenterê Partîya Çep a Keske yê Colemêrgî Vezîr Coşkun Parlakî kongre ra dima beno ke binê nameyê yew partî de xebatê sîyasî do bêrê dewamkerdene.

Parlakî pare kerd ke bi Meclîsê Partîye, hemserekan, hemvervatoxan, rêxistinanê qezayan ê Îtîfaqê Kede û Azadîye reyde proses ercnenê û vat: “Nika ma kombîyayîşanê şarî de rexne û ercnayîşanê şarî goşdarî kenê. Dima ma prosesî ser o gaman do bierzê. Ez wazena nê çîyî vaja ke seba ma ercnayîş û pêşnîyazê tewr ercîyayeyî kombîyayîşê şarî de yenê. Partîya ma nê prosesan ra dima êlule de do şora kongre û heyetanê xo yê neweyan dîyar bikera.”

Parlakî pê hesna ke hema zî bire nêdîyaya la wextê kongre de Partîya Çep a Keske do bername û tewirnameyê xo de vurîyayîşan bikera. Parlakî vat: “Beno ke nameyê partîye zî do bivurîyo. Komîteyê ma derheqê babete de xebatanê xo rê dewam kenê. Nika ra pey ma bi yew partî dewam bikerê. HDP prosesêkê girîngî de ronîya. Verî ke no mîras bêro wedaritene ma do formulêk aver berê.”

Parlakî bale ante ser ke waştişê şarî ser o polîtîkayî do şarî reyde bêrê dîyarkerdene û vat: “Tradîsyonê ma yo sîyasî xora şarî reyde biran dano, partîyê ma bi destê şarî awan bîyê û şarî reyde pîl bîyê. Nê wextanê peyênan de rexneyî yenê ke partî û şar pê dûrî kewtê. Ma bi girîngî nê rexneyan ser de vindenê û ma do seba nê çîyî mekanîzmayanê xurtan awan bikerê.”

MERKEZÊ XEBERAN