Parlamenteranê HDPyî ra gazîye: Ganî vengê Abdullah Ocalanî bieşnawîyo

• Parlamenteranê HDPyî Nobeta Edaletî de dîyar kerd ke, îqtîdar wazeno bi tecrîdî sîyasetî dîzayn bikero.

Nobeta Edaletî ya ke vera tecrîdî yena girewtene dewam kena. Parlamenteranê HDPyî verê Berê Dîkmenî meclîse de malûmatêk da. 

Parlamentere Remzîye Tosûne va, “2 serrî yo ke Birêz Ocalanî ra xebere nêgêrîyena. Keye û awiqatî nêşkayê şorê Îmrali. Ma vera na rewşe nobeta xo ramnenê. Ma heta netîceyêk bigerê do dewam bikera.”

‘Ganî vengê Abdullah Ocalanî bieşnawîyo’

Remzîye Tosûne va, “Ganî cade derheqê sihet û ewlehîya Birêz Ocalanî de malûmatî raya pêroyîye reyde bêrê parekerdiş. Vengê Birêz Ocalanî ganî bieşnawîyo. Serranê 2013-15î de vengê Birêz Ocalanî ke ameyêne, domanê şarî mîyanê tawitan de nêameyêne. Ma zanê ke, vengê Birêz Ocalanî ke vejîyo, proseso birûmet do dest pêbikero. La AKP îqtîdarê xo mîyanê nê kaosî de ramneno. Coka pêro komelî tecrîd keno.”

‘Çalakîyê ma do dewam bikerê’

Tosûne dîyar kerd ke, ê bi çalakîyanê xo waştişanê şarî îfade kenê û va, “Ganî cade pêvînayîşî bêrê kerdene. Eke pêvînayîşî mebê, çalakîyê ma do her ca de dewam bikerê. Çunke no erd hinî gonî rê mird bîyo. Ganî cade Birêz Ocalanî ra xebere bêra girewtene.”

Parlamenterê HDPyî yê Îstanbûlî Erol Katircioglûyî zî va, “Birêz Ocalanî reyde nêzdîyê 2 serrî yo ke pêvînayîşî nêbenê û no nîno qebulkerdiş. Na rewşe vera hewqanê merdiman û erjanê mîyannetewîyan a. Birêz Ocalan eynî sey Mandelayê Afrîkaya Başûre yo û eşkeno haştîye biyaro nê welatî. Birêz Ocalan merdimê fikrî yo. Coka seba ke meseleyi bêrê çareserkerdiş, fikranê ey rê îhtîyacîya ma esta. Ma wazenê wa tecrîd wedarîyo û wa vengê Birêz Ocalanî bieşnawîyo. Ganî şarê Rojhelatê Mîyanênî zî bieşnawê ke Birêz Ocalan çi fikirîyeno.”

MA / ENQERA