Partî û rêxistinanê Kurdan Amed de PDK rê gazîye kerde

Hemserekê DTKyî Berdan Ozturkî PDK rê gazîye kerde ke wa rolêkî texrîbkarî ra dûrî vindero.

Hetê DTK, DBP, TJA, Meclîsê Dayîkanê Haştîye, MED-TUHADFED, MEBYA-DER û partîya PÎAyî ra derheqê hêrişanê PDKyî de eşkerayîye ameye dayene. Xeylê temsîlkarê partî û rêxistinanê sivîlan bîyê beşdarê eşkerayîye.

Metnê eşkerayîye hetê Hemserekê DTKyî Berdan Ozturkî ra ame wendene. Ozturkî va, “No proses ma ser de ferz keno ke ma destkewteyanê xo bipawê. Kesê ke wazenê Kurdî wa bivejîyê sehneyê tarîxî ganî bi nê xesasîyetî têbigêrê.”

‘Ganî feydeyê şarî bibo esas’

Ame vatiş ke, “Kurdî her het ra raştê hêrişan yenê. Hetê hêzanê mintiqa û mîyanneteweyîyan ra destkewteyanê Kurdan rê hêrişî benê. Wextêko winasî de ma îxtîmalê şerî yê mabênê Kurdan qetîyen qebûl nêkenê. Ma serran ra nat seba yewîyîya neteweyî ya Kurdan kede danê û ma vanê ke wa feydeyê şarî esas bêro girewtene.”

Şar do çirey ef mekero

Dewamê metnî de ame vatiş ke, “Kurdan hem verê îşxalê Kurdistanî hem dima ci xoverdayîşêko bêemsal dayo. Nê xoverdayîşî Kurdan rê bîyê game û tecrubeyî. Kurdî seba azadîya xo xo ver danê û hêzê ke kolonyalîstan reyde kar kenê do bi kerdenanê xo bibê risîya. Hêzê ke wazenê şerê Birakûjîyî vejê wa bizanê ke şarê ma do çirey înan ef mekero. Ma berpirsîyaranê nê hêrişan ra vanê wa rolêkî texrîbkarî ra dûrî vinderê û w abi berpirsîyarîya exlaqî, wijdanî û tarîxîyî têbigêrê.”

Hêzanê Kurdistanîyan rê gazîye

Peynî de ame vatiş ke, “Ma sere de şarê xo rê, hêzanê Kurdistanîyan rê, roşvîran û hunermedanê xo rê gazîye kenê: Kesê ke wayîrê heskerdişê şarî û welatî yê, ganî seba pawitişê destkewteyan û seba ke verê şerî bigerê ganî bi cîdîyet têbigêrê. Meşte beno ke erey bo. Xoverdayîşê ma yê se serran eşkeno ma aver de bero. Sey Kobanî û Kerkûkî, eke ma pîya hereket bikerê ma do reyna serbikewê.”

MA / AMED