Partîya Çep a Keske do vera tecrîdî kampanya bida dest pêkerdene

Mujdat CAN / MA / AMED

Parlamenterê Partîya Çep a Keske yê Amedî Serhet Erenî dîyar kerd ke do partî vera tecrîd û girewteyanê nêweşan kampanyayêk bida dest pêkerdene.

Girewteyî, hepisxaneyan de raşrê îşkenceyani muameleyanê xiraban û tecrîdî yenê. Parlamenterê Partîya Çep a Keske yê Amedî Serhat Erenî dîyar kerd ke hukmat na mesele de polîtîkaya xo nêbedilneno.

‘ATK xoser nîyo’

Erenî dîyar kerd ke ATK( Sazîya Tib a Edlî) tedawî û tehlîyeyanê girrewteyan de cayêko zaf muhîm de ya û va, “Serekê na sazîye hetê Serekkomare ra yeno tayînkerdiş û talîmatanê Erdoganî ra teber nêşkeno xoser têbigêro. Hetê ATKyî ra raporî yenê dayene ke girewteyî eşkenê hepis de bimanê û girewteyê nêweşî hepis de mirenê. Polîtîkayêke yene ramitene ke wa girewteyê nêweşî hepis de bimirê. Rapor dîya Şakîr Turanî û raporî ra 20 rojî dima hepis de merd. No vera girewteyanê Kurdan muameleyê heyfgirewtişî yo.”

Hiqûqê dişmenîye

Erenî dîyar kerd ke derheqê rewşa girewteyan de qerarê AÎHMî estê û va, “Nê qerarî hetê Tirkîya ra nînê caardene û vera Kurdan hiqûqê dişmenîye yeno ramitene. Vanê wa girewteyî mîyanê wextî de bimirê. Wazenê nê merdiman ra heyf bigerê. Înan rê Kurdê merdeyî û weşî eynî yê. Dewlete 8 serrî yo vera Kurdan polîtîkayêka winasî ramnena û nê zî leteyê na polîtîka yê. Dewlete wazena merdeyanê Kurdan ra zî heyf bigera.”

Çimeyê bêhiqûqîyan tecrîd o

Erenî dîyar kerd ke çimeyê bêhiqûqîyan tecrîd o û va, “Komel vera tecrîdî bêveng maneno û no zî cesaret dano îqtîdarî. Nika na polîtîka pêro komelî ra vila bîya.”

Erenî pare kerd ke Partîya Çep a Keske, vera tecrîdî û rewşa girewteyanê nêweşan hazirîya kampanyayêk kena.