Uçare: Ma bi fikrê pîlkerdişê vurîyayîşî şonê kongre

Dîlan BABAT / JINNEWS

Hemverfeka Partîya Çep a Keske Çîgdem Kiliçgun Uçare dîyar kerd ke partî do fikrê vurîyayîşî pîl bikera.

Partîya Çep a Keske, kombîyayîşan û konferansan ra dima xo hedre kena ke 15ê Teşrîna Verênê de kongreya xo ya 4ine viraza. Hemverfeka Partîya Çep a Keske Çîgdem Kiliçgun Uçare derheqê xebatanê partî de erjnayîşî kerdê.

Uçare derheqê xebatanê weçînayîşî ra dima ameyê kerdene de va, “Zeîfîya têtilîya partî û şarî, merkezîbîyayîş û kêmanîya îdeolojîk ma mecbur verdayê ke ma nê xebatan bikerê. No proses de ma 2 hezar kombîyayîşî viraştê û ma des hezaran kesan de ameyê têhet. Seba ke ma verê xo bivînê û xeta xo ya sîyasî dîyar bikerê nê xebatî ma rê bîyê tecrube. Ma nê prosesî ra hîna bihêze vejîyayê.”

Prosesêko muhîm bi

Uçare va, “Na partî, partîya şarî ya û hêza xo zî şarî ra gêna. Ma reyna dî ke bê şarî polîtîkayî nînê ramitene. No proses biney cesaret waştêne la seba ke îdîaya ma esta ke ma xebatanê xo û paradigmaya xo bi şarê xo reyde rayra benê, no proses seba ma hîna bi muhîm.”

Kongreya vurîyayîşî 

Uçare va, “2015î ra nat vera HDPyî xeylê tedayî bîyê, rejîmê qeyûman dewam keno û xeylê kesî yenê girewtene. Reyna zî ma konferansanê xo de dî ke hêvîya şarî pîla ke no îqtîdar bibedilîyo. Weçînayîşan de zî reyna xeta ma ya sîyasî şarî de na hêvîye peyda kerde. Ma eşkenê bi kilmî vajê no zî stratejîyê rayîrê 3yinî yo. Ma do bi îddîaya vurîyayîşî kongreya xo bikerê. Ma do îdare û rêxistinîya bihêze awan bikerê û îddîaya xo ya vurîyayîşî zî pîl bikerê.”