‘PENa Kurde nimûneyê yewîtîya neteweyî ya’

çarşem 20 tîrmehê 2022 - 08:12

PENa Kurde, kongreya xo ya 11ine 9ê Temûze de bajarê Oldenburgî yê Almanyayî de viraşte. Kongreye de seba hemserektîya PENa Kurde Omer Fîdan û Anîsa Cahferîmehr ameyê weçînayîş.

Hemserekê neweyî yê PENa Kurde Omer Fîdanî derheqê kongreye û xebatanê PENa Kurde erjnayîşî kerdê. Omer Fîdanî va, “Kongreya 11ine ya PENa Kurde de pêro lehçe û bawerîyê çar leteyê Kurdistanî temsîl bîyê. Kongreyêka başe û xurte bî.”

Averberdişê name û vengê edebîyatê Kurdkî

Hemserekê PENa Kurde Omer Fîdanî va, “Nika 442 endamê PENa Kurde estê. Kongreya 10ine ra heta kongreya 11ine nêzdîyê 200 kesî bîyê endamê PENa Kurde. No raşta zî serkewtişêko pîl o. Endamê ma û xebatê înan hetê dewletan ra ameybî astengkerdiş. Ma endamanê xo rê bîyê hetkar. Seba averberdişê name û vengê edebîyatê Kurdkî ma PENa Mîyanneteweyî reyde xebitîyayê. Ma beşdarê pêro kongreyanê PENa Mîyanneteweyî bîyê û derheqê Kurdan û Kurdistanî de raporê xo pêşkêş kerdê.”

Merkezê PENa Kurde Dîyarbekir o

Derheqê meseleya merkezê PENa Kurde de Omer Fîdanî va, “Merkezê PENa Kurde Dîyarbekir o. Çimkî zaferîyê endamanê ma Dîyarbekirî de yê û ma xebatanê xo Dîyarbekirî de ramnenê. Seba ke zaferîyê xebatanê ma neteweyî yê, ma xebatanê xo warê mîyanneteweyî de ramnenê. La merkezê PENa Kurde Dîyarbekir o.”

Şermê dewleta Almanyayî

Omer Fîdanî va, “Kurdî nêşkenê kongreya sazgeya xo ya sîvîle erdê xo ser de bivirazê. Eke ma kongreya xo Dîyarbekir de biviraştêne, do rojhelat, rojava û Başûrê Kurdistanî ra xeylê endamî nêşkayêne beşdarê kongreye bibê. Seba leteyanê bînan zî rewşe eynî ya. Almanya vîze nêda tayê endamanê ma û ê nêşkayê beşdarê kongreye bibê. Ma seba îtîrazî muraceatê Konsolosîya Almanayayî kerd la havile nêkerde. No seba dewleta Almanyayî şerm o. Ê zî sey serdestanê Kurdan têgêrenê. Zehmetî û tenganîyî virazîyayê la reyna zî kongreya ma başe vîyerte.”

Estbîyayîş xobîyayîş o

Hemserekê PENa Kurde Omer Fîdanî peynî de va, “Seba xebatanê ziwanî ‘Komîteya Heqê Ziwan û Açarnayîşî ya PENa Mîyanneteweyî esta. PENa Kurde zî mîyanê na komiteye de xeylê çalak a. Tedeyîya na komiteye de ma pîya xeylê xebatan kenê. Ma pêşnîyaz kerdo ke, Kurdistan Actian Group awane bikerê. Ma wazenê seba Kurdistanî wa PENa Mîyanneteweyî komêk awane bikera. Heta estbîyayîş çin bo, xobîyayîş nêbeno. Ma ganî pêro pîya estbîyayîşê xo bipawê ke xobîyayîşo xurt peyda bibo. Xobîyayîş rayîrê yewekî yê xelasîya şarêkî yo.”

XWEBÛN

       

 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.