Pîrî û alimî: Ganî Abdullah Ocalan azad bibo

Pîranê Elewîyan û aliman dîyar kerd ke meseleya Kurdan de muxatab Abdullah Ocalan o û ganî azad bibo.

Pîranê Elewîyan û alimanê dînî derheqê tecrîd û polîtîkayanê şerî de Beyoglû de Merkezê Pêroyî yê HDKyî de eşkerayîye kerde. Xeylê pîr û alimî bîyê beşdarê eşkerayîye.

‘Sûcê merdimatîye yeno kerdene’

Alimê dînî Bedrettîn Gunayî va, “Îqtîdar o ke bi zîhnîyetê Emevîyan raye ra şono, Îsraîlî ra vano ti zulimkar î la Kurdan înkar keno û vera înan polîtîkayanê şerî giran keno. Sîstem vera Kurd û Elewîyan polîtîkaya cîyakarîye ramneno û sûcê merdimatîye keno.”

‘Cayo ke tede haştîye çin a Îslam zî çin o’

Gunayî va, “Îqtîdar nêşkeno zulm û neheqîyanê xo bi dînî binimno. Cayo ke tede edelet û haştîye çin bê Îslam zî çin o. Kesê ke xo sey bisilmanî vînênê ganî verê mazlûman de ca bigerê. Ganî vera zulmî pêro cîyayîyî têhet de biciwîyê û cuyêka hempare awan bikerê.”

Seba Abdullah Ocalanî gazîye  

Guneyî bale ante tecrîdî ser o û va, “Birêz Abdullah Ocalan, şexsîyetêko normal nîyo. Bi mîlyonan kesan vato îradeyê ma yo û seba azadîya ci çalakîyî yenê kerdene. Birêz Abdullah Ocalan binê tecrîdî de yo la reyna zî her firsend de seba haştîye kede daya. Çareserîya meseleya Kurdan de muxatab Birêz Abdullah Ocalan o. Seba ke Tirkîya û Rojhelato Mîyanên de demokrasî û azadî bêrê awankerdene ganî Birêz Abdullah Ocalan bi fizîkî azad bibo.”

‘Kesê ke bêceng ê şerîkê sûcî yê’

Pîrê Elewîyan Huseyîn Esenî va, “Kesê ke bêveng manenê şerîkê sûcî yê. Xirabîyî normalîze benê. Ma vînenê ke Filistîn de xeylê însanan cuya xo vîndî kerde. Tîya de zî Kurdî seba ke heqanê xo wazenê, wazenê ziwanê xo de perwerde bigerê raştê zulmî yenê û yenê înkarkerdiş. Eke na mesele wextê xo de çareser meba do biba sey meseleya Îsraîl û Filistînî. Aye ra ma ganî timûtim vengê haştîye berz bikerê.”

MA / ÎSTANBÛL