No Kurdan rê xiyaneto

şemî 16 tîrmehê 2022 - 10:50

  • Amîneh Kakabaveh: Kurdan erzenê mîyanê şerî. No Kurdan rê îxanet o.

GOZDE ÇAGRI OZKOSE / MA

Parlamentera Xoser a Kurde ya Parlamentoya Swêdî Amîneh Kakabaveh va, “Kurdan erzenê mîyanê şerî. No Kurdan rê îxanet o. Welatê Ewrûpayî yê qaşo demokratî zî Erdoganî de pêkenê.”

Parlamentera Kurde ya Parlamentoya Swêdî Amîneh Kakabaveh derheqê polîtîkayanê Nato, Ewrûpa û Amerîkayî de qisey kerda. 

Derheqê tîkilîya Swêd û Natoyî de Amîneh Kakabaveh va, “Wextê şerê serdinî de Sovyetî qewetin bî û Swêd zeîf bî. La reyna zî bi çekan û bi şerî hereket nêkerd. Ez cewabê ney kapîtalîzmî de vînena. Merdimê karî yê Swêdî û raştgirê ci wazenê tîcaretê çekan bikerê. Wazenê ekonomîyê xo pîl bikerê û merdimanê sey Erdoganî de pêyenê. Hetêk ra behsê heqan kenê, femînîzm kenê, demokrasîyî kenê la şonê memorandûmêko winasî îmza kenê. Bi memeramdûmî do heqê multecîyan binpay bibê. Na rewşe îxlalkerdişê qanûnanê Swêdî yo. Kurdî, muxalîfî û multecîyê multecîyî kewenê na rewşe ver. Qerarê têpîyaşawitişî destê mehkemayan de yo. Nika Swêd de behs beno ke do multecîyanê sîyasîyan bierşawê Tirkîya. Kurdî û heqî seba muqaveleyanê karî bîyê hacet. Eşkera bîyo ke Swêd 4 kesî daye Tirkîya la ma nêzanê nê kesî kam ê.”

Derheqê meseleya beşdarbîyayîşê NATOyî de Amîneh Kakabaveh va, “Swêd 14 serran ra nat hetê raştgiran ra yeno îdarekerdiş. Derheqê beşdarbîyayîşê NATOyî de demêk verî cû anketêk amebi viraştiş û zaferîyê şarî beşdarbîyayîşê NATOyî ra vatibi ney. Şar terseno ke polîtîkayê Erdoganî Swêdî de kar bikerê. Şar tîya de heqanê xo nêzano û medya zî deste serdestan de ya.

“Pûtîn Ukraynayî de se keno, Tirkîya zî vera Kurdan eynî çîyan kena”

Amîneh Kakabaveh va, “Medya nika şarê tîyayî ra vano ma şerî ra zaf bîyê nêzdî û şar zî terseno. La ma zanê ke Pûtîn Ukrayna de sernêkewto. Pûtin Ukraynayî de se keno, Tirkîya zî vera Kurdan eynî çîyan kena. Qaşo welatê demokratî yê Ewrûpa zî Erdoganî de pêkenê. Na raşta zî rewşêka ecêb a. Na dirîtîye ver qelibê merdimî yeno.” 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.