PYD: Hêrîşê Tirkîya nêtîceyê kombîyayîşê Tehranî yê

duşem 25 tîrmehê 2022 - 17:03

PYD derheqê hêrîşanê Tirkîya de malûmatêk weşana.

Meclîsa Pêroyî ya Partîya Yewbîyayîşî ya Demokratîke derheqê hêrîşanê Tirkîya de malûmatêk weşana û hêrîşî ameyê şermezarkerdiş.

Malûmatî de nîya vajîya:

“Tirkîya her roje, her saete vera mintiqayanê Bakur û Rojhelatê Sûrîyeyî polîtîkayanê qirkerdişî û heyfgirewtişî ramnena. Bêvengîya dinya ra paştî gena û heqanê merdiman ê bingeyinan binpay kena. Vîzêr vera hemrayanê ma hêrîşêk ame kerdene û qetlîamî de 3 hevalê ma şehîd kewtê. Nê hevalê ma qûmandanê YPJyî bî û vera Daîşî serkewtibî. Tirkîya hêrîşanê xo her roje zêdînena. Nê hêrîşî netîceyê kombîyayîşê Tehranî yê. Wazenê bi şîdet û krîzan polîtîkayanê xo yê îşxalkerdişan biramnê.

Verê çimanê dinya de sûcî yenê kerdene

Ma kerdenanê bêexlaqan ê Tirkîya red kenê. No sûcêk o û vera şaranê mintiqa leteyêkî planê înan o. nê qetlîamî do mevindê. Tirkîya nîyet kerdo ke hêrîşanê xo bizêdna û gonîya şarê ma birişna. Vîzer vere çimanê dinya de sûcêk ame kerdene. Tirkîya nêwazena çareserîyêk biba. Na hêrîşe vera pêro merdimîye ameya kerdene. Neteweyê Yewbîyayeyî û hêzê mîyanneteweyî vera nê hêrîşan vengê xo nêkenê. Ma înan şermezar kenê û înan ra vanê ganî seba vindarnayîşê hêrîşanê Tirkîya têbigerê.

Hêrîşê bêmabênî

Wehşîtîya rejîmê Tirkîya ver do hêzê mimtiqa metersê û xebatanê xo biramnê. Hêrîşanê Tirkîya ra dîyar beno ke, wazena operasyonêk bikera. Ganî hêzê mintiqa meseleyanê bidê hetêk û vera îşxalkaran bibê yew. Ganî dewletê Ereban û dewletê bînî zî Tirkîya şermezar bikerê û vera hêrîşan têbigerê.”

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.