Seba azadîya Abdullah Ocalanî 2 aşmî de 2 mîlyon û 646 hezar îmzayî ameyê arêdayîş

MELÎKE AVCI / JINNEWS

Endamê heyetî Xanîm Eyo dîyar kerd ke 2 mîlyonî ra zêderî îmzayî pêser bîyê û CPTyî de pêvînayîşêk ameyo kerdene.

25ê Adare 2021î ra nat Serekê PKKyî Abdullah Ocalanî ra xebere nîna girewtene. Seba ke tecrîd bişikîyo û seba azadîya fizîkî Bakur û Rojhelatê Sûrîyeyî de 2 mîlyon û 646 hezar û 211 îmsayê ameyê arêdayîş. Îmzayî teslîmê CPT Û OHCHRyî bîyê. 

Hemsereka Înîsîyatîfê Pawitişî yê Abdullah Ocalanî yê Sûrîyeyî Xanîm Eyo derheqê mesele de erjnayîşî kerdê.

Têkilîya Abdullah Ocalanî û şarî yena birnayene

Xanîm Eyo va, “29 aşmî yo ke Abdullah Ocalanî ra xebere nîna girewtene. Na rewşe hem binparkerdişê qanûnanê Tirkîya hem zî yê hiqûqê mîyanneteweyî ya. Wazenê têkilîya Rayber Ocalan û şarî bibirnê. Na mesele sîyasî ya. Eleqeyê xo bi hiqûqî çin a.”

2 aşmî de 2 mîlyon û 646 hezar îmzayî

Eyo derheqê kampanyaya îmzayan de qisey kerd û va, “Seba kampanyaya îmzayan komîteyî ameyê awankerdiş. Înîsîyatîf komîteyan de reyde hereket kerd. Tena Rojava de ney, Başûr, Lubnan, Heleb û Şam de zî xeylê kesan paştî da kampanya. Kampanya aşma Çeleyî de dest pêkerd û 2 aşmî de 2 mîlyon û 646 hezar îmazî ameyê pêser.”

CPT Ocalanî de pêvînayîş kerd

Eyo dîyar kerd ke îmzayî dîyayê CPT û NYyî û va, “Ma îmzayî dayê CPT û 8ê Tebaxe de ma pêvînayîşêk kerd. Ma dîyar kerd ke demêko derg ra nat Rayber Ocalanî ra xebere çin a û ma qisawetê xo vatê. Înan zî dîyar kerd ke karê înan teqîbkerdişê rewşa girewtîyan o û rapor hedrekerdiş o. Înan dîyar kerd ke par Rayber Ocalanî û hîrê girewteyanê bînan de pêvînayîş bîyo, rapor ameyo hedrekerdiş û teslîmê Tirkîya bîyo. La hetê înan ra ameyo dîyarkerdiş ke heta ke Tirkîya destûr medo ê nêşkenê raporî eşkera bikerê.”