Seba Nagîhan Akarsele Mexmûr û Silêmanîye de yadkerdiş

Qetilkerdişê Endama Merkezê Cigêrayîşî yê Jîneolojî Nagîhan Akarsele Kampa Multecîyan a Şehîd Rûstem Cûdîyî (Mexmûr) û Silêmanîye de ame şermezarkerdene.

Mexmûr de şarî çalakîya rayraşîyayîşî kerde. Girse ver bi Ofîsê Neteweyanê Yewbîyayeyan (NY) şîye. Çalakîye de sloganê sey ‘Şehîdî nêmirenî’, ‘Biciwîyo xoverdayîşê cinîyan’, ‘Cinîye, cuye, azadîye’ ameyî vatene. Endama Koordînasyonê Meclîsê Îştarî Fadîle Toke verê Ofîsê NYyî de eşkerayîye wende.

Eşkerayîye de bale ameye antene hemkarîya îdareyê Başûrî ya bi Tirkîya ser û ame parekerdene ke Nagîhane temsîla cinîya azade bîya. Fadîle Toke vat: “Ma do xayînan ra hesab bipersê û qesasê Nagîhane bigêrê.”

Silêmanîye de bi seyan cinîyî û temsîlkarê dezgeh û rêxistinan seba Nagîhan Akarsele rayîr a şîyî. Çalakîya rayraşîyayîşî de sloganê ‘cinîye, cuye, azadîye’ ame berzkerdene. Çalakîye de Hemsereka Tevgera Azadî Tara Husêne qisey kerd û vera hukmatê Başûrê Kurdistanî nêrazîbîyayîşê xo mojna. Tara venga hêzanê asayîşî da ke eke ê cinîyan nêpawê cinîyî do xo bipawê. Cinîyan dima bi çelenkê sîyayî çalakîya rayraşîyayîşî kerde û çelenk verê bînaya YNKyî de naro. Cinîyan tîya de zî çalakîya roniştişî kerde û bi sloganan vila bîyî.

XWEBÛN