Seba prosesê neweyî vernîyê Sûrîyeyijan de şansêko pîl esto

Serekê Kûrûla Rayraberdişî ya Meclîsa Sûrîyeyî ya Demokratîke Îlham Ehmede va, “Ma ganî hêzanê mîyannetewîyan ra çareserî mepawê.”

Reqayî de bi beşdarîya sîyasetmedar û hiqûqnasan kargehêk ameye viraştene. Kargehe de hetê Îlham Ehmede ra rewşa sîyasî ameye erjnayîş.

‘Mudaxeleyê teberî çareserîye asteng kenê’

Îlham Ehmede va, “Ma wazenê rewşa sîyasî û muhîmîya çareserîya sîyasî ser o nîqaş bikerê. Mudaxeleyê ke teberi ra benê, vernîyê çareserîye de asteng ê. Seba ke m ana kongre bivirazê, ma xeylê pêvînayîşî kerdê. Hinî ekserîyê Sûrîyeyijan wazeno çareserîya sîyasî biba. Ma bi kongreya xo waşt temsîlkarê şarî bêrê têhet. Seba ke Sûrîye de hegemonya biqedîya, ganî ma hîna zêde bêrê pêser û vurîyayîşêk awan bikerê. wexto ke nê hêzî bêrê têhet, do seba Sûrîyeyî rewşêka newîye bêra awankerdiş. Xeylê şansî destê ma ra şîyê la ez vana vernîyê Sûrîyeyijan de şansêko pîl esto.”

‘Wazenê bi kombîyayîşanê mîyannetewîyan Rojhelatê Mîyanênî kontrol bikerê’

Dewamê qiseykerdişê xo de Îlham Ehmede va, “Kombîyayîşê Madrîdî zaf muhîm bi. Nê kombîyayîşî de NATO waşt endamanê xo bizêdno û bi sîyasetê xo dinya dîzayn bikero. NATO wazeno verê Çîn, Rusya û Îranî bigero. Fikrê Tirkîya cîya bî coka kes goş nêna înan ser. Derdê Tirkîya îşxalkerdişê Bakur û Rojhelatê Sûrîyeyî yo. Pêro kombîyayîşanê mîyannetewîyan de rewşa Sûrîyeyî yena erjnayîş. Wazenê bi nê kombîyayîşan Rojhelatê Mîyanênî kontrol bikerê. Ma Sûrîyeyijî nê kombîyayîşan de ca nêgenê. Nêzdîbîyayîşê Tirkîya û Sûrîyeyî zirar dano şaranê Sûrîyeyî.”

‘Eke ma Sûrîyeyijî pêbikerê ma eşkenê qederê xo dîyar bikerê’
Îlham Ehmede peynî de va, “Şarê Sûrîyeyî xemê Tirkîya de nîyo. Tirkîya tena dosyaya multecîyan gurînena û naye ser ra xeylê pereyî girewtê. Eke ma Sûrîyeyijî derheqê ameyoxê Sûrîyeyî de pêbikerê, ma do bieşkê qederê xo dîyar bikerê. Eke ma biewnê hêzanê teberî ra, ma do çirey meeşkê şarê Sûrîyeyî bixelisnê. No kombîyayîş firsendêk o. Ma do bi yewîtîye şer û letebîyayîşî ra vajê ney. No krîz, krîzêko mîyannetewî yo. Aye ra ganî ma aqilane bifikirîyê û têkilîyanê xo xurt bikerê.”

ANHA / REQA