‘Sebebê krîzî polîtîkayê şerî yê’

• Dîyarbekirijan va çareserîye şîyayîşê Erdoganî yo.

Polîtîkayanê hukmatî ver krîz roje bi roje hîna giranêr beno. Krîz ke beno giran hêrsê welatîyan zî zêdîyeno. Hinî şar nêşkeno hewceyanê xo yê bingeyinan zî ca biyaro. Dîrabekirijî vanê, şero ke vera Kurdan yeno dayene bingeyê krîzî yo.

‘Erdogan şêro mesela safî bena’

Welatîyan ra Bayram Amanî va, “Hinî merdimî nêşkenê nan biherînê. Sebebê ney Erdogan o. Erdogan merdiman kişeno û erzeno hepsan. Erdogan ke şêro na mesela safî bena û krîz qedîyeno. Nê îqtîdarî ver merdimi merdê û zaf kes zî rema şi teber. Weçînayîşî de yan her kes keweno binê erdî yan zî no îqtîdar rijîyeno. Sewbîna rayîr çin o.”

‘Krîzêko keyfî esto’

Welatîyan ra Talîp Sanayî va, “Ekonomî her cayê dinya de bîyo problem la Tirkîya de krîzêko keyfî esto. 30 serrî ra nat şer esto. Koyê Kurdistanî yenê bombakerdiş. Dinyayêk pereyan danê eskeranê xo. Şerî rê zaf pere yeno xerckerdiş. Çira nêwazenê şer biqedîyo, çimkî bi no qeyde emrê xo kenê derg.Sîstemê dewlete wina wazeno.”

Ganî îqtîdar bivurîyo

Şefîk Aslanî va, “Îqtîdar ke bivurîyo, nê meseleyi çareser benê. Ma hinî nînan ra bêzar kerdo. Bi koçikî danê, bi çempikî têpîya genê. Ganî îqtîdar bivurîyo.”

Welî Mihemmed ê Dihokijî va, “Tirkîya sîvîlan qetil kena. Şarê Başûrî nêwazeno nê hêrîşî bibê. Nê hêrîşan de domanî mirenê. Ma şer nêwazenê, ma nêwazenê hêrîşî bibê. Eke şer biqedîyo, do ekonomî zî baş bibo.”

Malîyeto tewr pîl şerî rê şino

Welatîyan ra Mehmet Çelîkoglûyî va, “Bêkarîye û bêçaretîye zêdîyenê. Ciwanî kewenê çala xirabîyan. Îqtîdar nêşkeno meseleyan safî bikero. Eke nîya şêro do xirabêr bo. Malîyeto tewr pîl şerî rê şino. Ma şer nêwazenê.”

MA / AMED