Sonmez: Tirkîya de ahengîye çin a

Tirkîya de weçînayîşî qedîyayî, la nîqaşê krîzê ekonomîkî dewam kenê. Ekonomîsnas Mustafa Sonmezî derheqê rewşa ekonomî û weçînayîşî de ANFyî rê tayê ercnayîşî kerdî.

Ekonomînas Mustafa Sonmezî ard ziwan ke Tirkîya hetê ekonomî ra rewşêka zore de ya û wina vat: “Weçînayîşanê peyênan no mojna ra. Welat de ahengîyêke çin a. Sermayedarê teberî coka verê xo nêdanê tîya.”

Sonmezî bale ante kêmîyayîşê rezervanê dowîzî ser û vat: “Bêşik meseleya dowîzî est a. Ekonomîya Tirkîya nêeşkena dowîzan qezenç bikera la xerc kena. Tirkîya zafêr teberê welatî ra gêna. Seba ney zî dowîz lazim o. Seba dowîzî waştiş zaf o la pêşkêşkerdiş tay o. Coka dowîz vera beno vay. Hukmat keno ke waştişî kêm bikero û vaya dowîzî kontrol bikero. Seba ney zî xîret keno ke bale bianco lîraya tirkan ser. Seba ney zî ganî faîz biameyêne zêdekerdene. La hukmat aqsê ci vera faîzî kêmîneno.”

Mustafa Sonmezî da zanayene ke sermayedarê mîyanneteweyî wazenê sermayeya xo Tirkîya de bişuxilnê la seba ke rewşa Tirkîya dîyar nîya vinderte yê. Sonmezî vist vîrî ke weçînayîşê herêmî nêzdî yê coka eşkera nîyo ke Erdogan polîtîkaya faîzê kêmî ra fek vera bido yan ney.

Sonmezî pare kerd ke welat hetê demografîkî ra bîyo di lete û vat: “Weçînayîşanê peyênan no mojna ra. Welat de ahengîyêke çin a.

Sermayedarê teberî coka verê xo nêdanê tîya. Sermayedarî do rewşe biercnê û goreyê ney bira sermayedayîşî bidê.”

MERKEZÊ XEBERAN