Serra 2023yî do biba serra azadîya fizîkî ya Ocalanî

• Rêxistinê HDPyî yê Amedî Kongreya xo viraşte. 

Rêxistinê HDPyî yê Amedî, Eywana Veyveyî ya Demîrokî yê Bajarêneweyî de kongreya xo ya 4ine viraşte. Eywane de pankartê Kurmanckî û Kirmanckî ameyê dardakerdene. Wekîlê bajarî, Verfeka HDPyî Ebrû Gunaye, Serekê Partîya Komunîst a Kurdistanî Sînan Çîftyurek, Serekê PDK-Tyî Mehmet Emîn Kardaş û temsîlkarê sivîlî beşdarê kongre bîyê.

Azadîya fizîkî ya Ocalanî

Kongre bi weçînitişê endamanê Dîwanî û yadkerdişî dest pêkerde. Qiseykerdişê akerdişî hetê Wekîla HDPyî Remzîye Tosûne ra ameye kerdene. Tosûne bale ante tecrîdî ser û va, “22 aşmî yo ke berê Îmraliyî kilîtkerde yê. Wa dost û dişmenî baş bizanê ke 2023yî do Kurdan rê biba serra serkewtişî. Serra 2023yî do biba serra azadîya fizîkî ya Birêz Ocalanî.”

Hemserekanê HDPyî yê Amedî Gulîstan Atasoy û Zeyyat Ceylanî mêmanî selam kerdê û înan mesajê “HDP hêvî ya, HDP îradeyî şarî yo” ameyê dayene.

Hetê Sînan Çîftyurek û Mehmet Emîn Kardaşî ra qiseykerdişî ameyê kerdene û înan gazîya yewîtîya Kurdan kerde.

‘Amed do raye medo faşîzmî’

Verfeka HDPyî Ebrû Gunaye va, “AKP seba ke verê ma bigero derheqê partîya ma de dewaya padayîşî akerde û hesabê ma bloke kerdê. Ma pêroyî hol zanê ke kes nêşkeno îradeyê şarî bloke bikero. Amed do raye medo faşîzmî. Ma do çirey çok menê ro. HDP do rayberîya rayîrê 3yinî bikero. Ma do bi namzetê Serekkomarîye xo parlamento de temsîlîyeta hîra dest bifînê. Ma vîzêr serkewtê, ma do meşte zî serbikewê.”
Qiseykerdişan ra dima raporê malî û faalîyetî ameyê wendene û hetê delegeyan ra rayî ameyê eştene. Raydayîşan ra dima, Gulîstan Atasoy û Zeyyat Ceylanî newe ra hemserekîya HDPyî rê ameyê weçînitiş.

MA / AMED