Sinêye de hetê cinîyan ra pêşengeya hunerê destan ameye akerdene

HÎMA RAD / NÛJINHA / SINÊ

Cinîyan bi muyî hunerê xo yê destan vetê meydan û înan pêşengeyêk akerde

Sinêya Rojhelatê Kurdistanî ya ke sey ‘Paytexta Newroze’ ameye dîyarkerdiş, narey pê pêşangeyêk şên bîya. Cinîyan bi keda destan lapikî, şal û şepikî û xeylê kinc û kolê bînî viraştê. Pêşengeya cinîyan reng bi reng a. Organîzetoranê pêşengeye ra Zehra Menbarî va, “Cinîyê tîyayî ekseri karê keyeyanê xo de eleqedar benê. Yanî cinîyî debareyê keyeyanê xo kenê. Ma wazenê vengê pêşengeya ma biraso her ca û cînîyê kedkarî heqê xo qezenc bikerê.” Pêşenge hetê xeylê kesan ra zîyaret bena. Wexto ke merdim pêşengeye ra vejîyeno, vîneno ke pêro dewlemendîya mintiqa binê banêkî de ameyê pêser. La çîyo tewr muhîm zî no yo ke, heme berhemî bi destan ameyê viraştiş.