Soylûyî îtîraf kerd

• Erdoganî waşt, mi 2 rojan de hel kerd

Wezîrê Karanê Zereyî Suleyman Soylûyî îtîraf kerd ke bi talîmatê Erdoganî qeyûmî ardê beledîyeyan ser.

11ê Êlule 2016î de qeyûmî erzîyayê 96 beledîyeyanê DBPyî ser. 19ê Tebaxe 2019î de zî hemserekê 65 beledîyeyanê HDPyî wezîfe ra ameyê girewtiş û herinda înan de qeyûmî ameyê tayînkerdiş.

Soylûyî her qiseykerdişê xo de beledîyeyê HDP û DBPyî hedef girewtê û îdîa kerd ke hemserekê girewteyî ‘êndamê rêxistinî’ yê.

Erdoganî talîmat da

Soylûyî, tewr peynî çalakîyêka partîya xo ya Gazîosmanpaşayî ya Îstanbûlî de derheqê tayînkerdişê qeyûman de îtîrafî kerdê. Soylûyî va, “Ez bîya wezîrê karanê zereyî. Serekkomarî veng a mi da û va; ‘Suleyman, ez beledîyeyanê Başûrê Rojhelatî û Rojhelatî yê destê HDP û PKKyî de yê ra eciz a. Çimkî ê domanan benê ko, çimkî ê bacanê dewlete PKKyî rê erşawenê, ê zî sey guleyan agêrenê Mehmetçîkanê ma. Ti ganî înan cade wezîfe ra bigerê.’ Mi çimêk waşt la Tayyîp Erdoganî di çimî dayê mi. Di rojî kewtê mabên, mi serê sibayî saete 8.00 de vera pêroyînan operasyon da dest pêkerdiş û mi pêroyî wezîfe ra girewtê.”

Vateyê Soylûyî, vateyanê Serfermandarê Artêşî yê verênî Dogan Guneşî ardê vîr ke ey vatibi; “Serekwezîre Çîllere vana teq, ez zî şeq ana ca.”

MERKEZÊ XEBERAN