Tahîr Elçî mezela xo ser de ame yadkerdene

Tahîr Elçî, serrgêra 8ine ya qetilbîyayîşî de mezela xo ser de ame yadkerdene.

Serekê Baroya Amedî Tahîr Elçî, 28ê Teşrîna Peyêne 2015î de qezaya Sûrî ya Amedî de vernîya Mînareya Çarlinge de ame qetilkerdene. Elçî, serrgêra 8ine ya qetilbîyayîşî de mezelcayê Yenîkoyî de mezela xo ser de ame yadkerdene. Serekê baroyan, parlamenter û pawitoxê heqan û keyeyê ci bîyê beşdarê yadkerdişî.

Serekê Baroya Amedî Nahît Erenî dîyar kerd ke 8 serrî vîyartê û faîlî hema zî eşkera nêbîyê û va, “Tahîr Elçî seba heqanê merdiman kede dayêne. Ey, pawitoxîya heqanê merdiman cuya xo rê kerdibî raybere. Ma reyna vanê; Tahîr Elçî do vîrê ma ra meşoro.”

Yadkerdişî de Ozturk Turkdoganî zî qisey kerd û dîyar kerd ke seba ke haştîye bêra Kurdistan Elçîyî kedêka pîle daye û va, “Vera şerî vengê xo berz kerd û bedelê ci zî bi ganê xo da. Hemrayê ma Tahîr Elçî; badê şîyayîşê toz î embazê ma yenê qetilkerdiş. Ma do seba haştîye xoverdayîşê xo biramnê. Ma do bi sîyasetê demokratîkî xoverdayîşê xo biramnê.”

MA / AMED