Tecrîdê Îmraliyî: Ganî CPT karê xo bikero

Fethî BALABAN / MA / SÊRT

Parlamentera Partîya Çep a Keske Sebahat Erdogan Saritaşe bale ante tecrîdî ser o û va, “Ganî sere de CPT û sazîyê hiqûqî yê mîyanneteweyî têbigêrê.”

Serekê PKKyî Abdullah Ocalanî ra 30 aşmî yo xebere nîna girewtene. Cewab nêdîyeno muracatanê keye û awiqatan. Parlamentera Partîya Çep a Keske ya Sêrtî Sebahat Erdogan Saritaşe dîyar kerd ke şexsê Abdullah Ocalanî de Kurdan ser de tecrîd yeno ramitene. 

Saritaşe dîyar kerd ke kombîyayîşanê şarî de tewr zêde meseleya tecrîdî ameye qiseykerdiş û va, “Seba çareserîya meseleyan wa berê Îmraliyî bêrê akerdene. Nika ma zanê ke hiqûq çin o û tîyatroyêk yena kaykerdene. Hem seba şarê Kurdî û hem seba şaranê bînan, ganî cade berê Îmraliyî abibê.

Saritaşe va, “No îqtîdar, goreyê qanûnê bingeyî yê darbeye faşîstî zî tênêgêreno. Seba ke tecrîd bêro wedartiş, pêro dinya de torêka xoverdayîşî ameye munitene. Dinya zana ke Birêz Ocalan seba Rojhelatê mîyanênî çiqas muhîm o. Ê zî vînenê ke paradîgmaya Birêz Ocalanî do biba çareserîya krîzanê Rojhelatê Mîyanênî.”

‘Ma ganî bi xoverdayîşî tecrîdî wedarê’

Saritaşe bale ante bêvengîya sazîyanê neteweyîyan û va, “Ganî sere de CPT û sazîyê hiqûqî yê mîyanneteweyî hereket bikerê û ganî no îşkenceyo bêhiqûq bêro wedartene. Sîstem, înkar û îmhakerdişê Kurdan ser ra xo ramneno. Tirkîya zî neteyê na polîtîkaya û coka tecrîdî ramnena. Ganî hetê şarî ra tora xoverdayîşî bêra munitene û tecrîd bi xoverdayîşî bêro wedartene.”